संचारक्षेत्रले ग्रामिण क्षेत्रसम्म पहुँच बढाउनुपर्ने

७ फागुन, हेटौंडा । संचारक्षेत्रले ग्रामिण क्षेत्रसम्म अाफ्नो पहुँच बढाउनु पर्ने शनिबार हेटौंडामा अायोजित कार्यक्रमका बक्ताहरूले जोड दिएका छन् । रेडियो थाहासंचारको नवौं बार्षिकोत्सवको अवसरमा अायोजित 'पत्रकारिता: विगत, वर्तमान र भविष्य' विषयक अन्तरक्रिया कार्यक्रमका वक्ताहरूले विषयवस्तुका लागि संचारक्षेत्रले ग्रामिण क्षेत्रसम्म पहुँच राख्नुपर्नेमा जोड दिएका हुन् ।

कार्यक्रममा बोल्दै थाहासंचार अनलाइनका प्रधान सम्पादक एवम् अग्रज पत्रकार तिर्थ कोइरालाले अहिलेको अवस्थामा संचार क्षेत्रले राजनीतिक भन्दा अार्थिक मुद्दालाई प्राथमिकता दिनुपर्नेमा जोड दिए । उनले अार्थिक क्षेत्रका समस्या र समाधानको पाटोलाई संचारक्षेत्रले समेट्नुपर्नेमा उनको जोड थियो । राजनीतिक भाषणभन्दा राजनीतिमा रहेका विकृतिको उजागर गर्दै सुधारका लागि कलम चलाउन उनको सुझाव थियो ।

कार्यक्रममा नेपाल पत्रकार महासंघका पूर्व केन्द्रीय सदस्य प्रताप विष्टले संचारमाध्यमको समाचार पक्ष बलियो भए स्थानीय सवाललाई बढि उजागर गर्न सक्ने बताउँदै पछि पारिएकाहरूको समाचारलाई प्राथमिकता दिनुपर्ने बताए । संचारकर्मी अार्थिक रूपमा बलियो भए उसले निर्धक्क संचारकर्ममा लाग्न सक्नेतर्फ संचारगृहले ध्यान दिनुपर्ने बताए ।

महासंघका उपाध्यक्ष गिरिजा अधिकारीले पछिल्लो समय संचारमाध्यममा शहर केन्द्रित समाचारले स्थान बढी र ग्रामीण भेगका समाचार अोझेलमा परेकाले यसतर्फ सचेत हुनु जरूरी रहेको बताए । कार्यक्रम रेडियोका प्रवन्ध निर्देशक अरूणराज सुमार्गीले संचारक्षेत्र र संचारकर्मी बलियो बनाउन अाफ्नो तर्फबाट सहयोग गरिरहेको बताए ।

कार्यक्रममा रेडियो कार्यवाहक स्टेसन म्यानेजर दर्शन क्षेत्री, कार्यक्रम संयोजक गोकुल अधिकारी लगायतले मन्तव्य राखेको कार्यक्रममा विभिन्न संचारमाध्यममा अावद्ध संचारकर्मीको सहभागिता रहेको थियो ।