नेकपा प्रदेश-३ संसदीय दलको बैठक निष्कर्षविहिन

२० पुस, हेटौंडा । सत्तारुढ नेपाल कम्युनिष्ट पार्टी (नेकपा) को ३ नम्बर प्रदेश संसदीय दलको बैठक निष्कर्षविहिन टुंगिएको छ । शुक्रबारदेखि मूख्यमन्त्री निवास हेटौँडामा बसेको बैठकमा प्रदेशको राजधानी र नामाकरणबारे छलफल चलेपनि निष्कर्षमा पुग्न नसकेको हो ।

बैठकमा सांसदहरुले राजधानी र नामाकरणमा नेकपा सचिवालय बैठकको पक्ष विपक्षमा धारणा राखेका थिए । अधिकांशले प्रदेशको नाम बाग्मति राख्ने विषयमा सकारात्मक धारणा राखेका थिए भने थोरैले अन्य नाममा सुझाव दिएका थिए । तर राजधानीको विषयमा भने धेरै सांसदहरुको फरक फरक धारणा आएको बैठकमा सहभागी एक सांसदले बताए । उनका अनुसार छलफलमा ३ दिनमा ६६ जनाले धारणा राखेका थिए ।

सचिवालयको निर्णयको विपक्षमा धारणा राख्ने सांसदहरुले राजधानी र नामाकरणबारे प्रदेश संसदीय दललाई निर्णय गर्न दिएको भए हुन्थ्यो भन्ने धारणा राखेको उनले बताए । बैठकले राजधानी र नामाकरणबारे ठोस निर्णय नलिएको नेकपा  प्रदेश ३ का प्रमुख सचेतक रामेश्वर फुँयालले जानकरी दिए । बैठक पुनः पुस २२ गते बस्ने जनाईएको छ ।

यसअघि नेपाली कांग्रेसको संसदीय दलको बैठकले प्रदेश राजधानी र नामाकरणबारे अभिव्यक्ति र मतदानमा व्हिप जारी नगर्ने र तत्कालिन परिस्थिति अनुसार पुस २१ गते साँझ बस्ने बैठकले थप निर्णय गर्ने निर्णय गरिसकेको छ ।