हेटौँडा र काभ्रेको पक्षमा अधिकांश सांसदको धारणा

२५ पुस, काठमाडौँ । प्रदेश नम्बर ३ को प्रदेशसभामा बिहीबार पनि स्थायी हेटौँडा र काभ्रेको पक्षमा सांसदहरुले बिभाजित धारणा राखेका छन् । 

प्रदेश राजधानी अध्ययन विशेष समितिले ५ जिल्लाको सम्भाव्यता प्रस्तुत गरेपनि प्रदेशसभामा भईरहेको छलफलमा भने अधिकांश सांसदहरुले हेटौँडा र काभ्रेको पक्षमा विभाजित भएर धारणा राखिरहेका छन् । विहिबार बोल्ने २१ प्रदेशसभा सदस्यमध्ये प्रदेशसभा सदस्य आशमाया तामाङ र केशवराज पाण्डेले नुवाकोटलाई राजधानी बनाउनुपर्ने माग राखे भने मिलनबाबु श्रेष्ठले चितवन पनि उपयुक्त रहेको बताए । आफ्नो धारणा राख्ने बाँकी सांसदहरु काभ्रे र हेटौँडाको पक्षमा बाँडिएका थिए । नेकपाका सांसद राजेन्द्र पाण्डेले भने हेटौँडा र काभ्रे दुबैलाई राजधानी बनाउन सुझाव दिए । उनले हिउँदे अधिवेशन हेटौँडामा र बर्षे अधिवेशन काभ्रेमा गर्न सुझाव पनि दिए । बैठकमा सांसद प्रेमबहादुर पुलामी, रिना गुरुङ, ओमबहादुर घलान, मुनु सिग्देल, सन्तबहादुर प्रजाले हेटौँडा प्रदेशको राजधानी हुन उपयुक्त रहेको बताएका थिए । उनीहरुले विगतमा पनि रणनीतिक महत्व, मध्माञ्चलको सदरमुकाम भैसकेको, संरचनाको पर्याप्तता लगायतका विषयले राजधानी हेटौँडा नै हुुनुपर्नेमा जोड दिए । 

बैठकमा राजेन्द्र गुरुङ, जीवन डंगोल, रमेश पौड्याल, राजकाजी महर्जन, बिजुला बर्मा, केशवप्रसाद पोखरेल, निमा लामा र हिमाली गोलीले राजधानी काभ्रे उपयुक्त हुने बताए । उनीहरुले भौगोलिक उपयुक्तता, सामाजिक अवस्था, पूर्वाधार, पायकको हिसावले पनि काभ्रे उपयुक्त हुनुपर्नेमा जोड दिए ।

त्यसैगरी, जगत सिम्खडा, न्हुक्षेनारायण श्रेष्ठ, काजीमान श्रेष्ठ, लालकुमारी पुनले राजधानी सम्भाव्यता अध्ययन समितिलाई गम्भिर ढंगले अध्ययन गरी उपयुक्त निर्णय लिनुपर्नेमा जोड दिएका थिए ।