राजधानीको निर्णय हुँदै गर्दा मूख्यमन्त्री पौडेलको बढ्यो साख

२६ पुस, हेटौँडा । ३ नम्बर प्रदेशको राजधानीबारे औपचारिक निर्णय हुँदै गर्दा मूख्यमन्त्री डोरमणी पौडेलको साख बढेको चर्चा सर्वसाधारणमा छ । आइतबार प्रदेशको स्थायी राजधानी र नामकरण हुँदै गर्दा पौडेलको राजनैतिक साख बढेको हो । 
दुईबर्षदेखि प्रदेशको स्थायी राजधानी र नामकरण ल्याउन नसकेको भन्दै अनेक अपजस खेप्दै आएका मूख्यमन्त्री पौडेललाई स्वतन्त्र सांसद प्रेमबहादुर तामाङले समेत धन्यवाद दिए । उनले संसदमा धारणा राख्दै भने–‘राजधानीबारे निर्णय नगर्दा कहिले झोक चल्थ्यो र रिस उठ्यो, तर मूख्यमन्त्री ज्यूको धैर्यता, सहनशिलता, लगनशिलता, हिम्मत र निर्णय गर्ने क्षमताप्रति रेड स्यालुट गर्दै बधाई दिन चाहन्छु ।’ 
यसअघि पटक–पटक प्रदेश ३ मा दुई तिहाई रहेको नेकपाले राजधानी र नामकरण गर्न नसकेको भन्दै नेकपाभित्रै र अन्य दलबाट मूख्यमन्त्री पौडेलको कार्यक्षमता र निर्णय क्षमतामा प्रश्न उठ्दै आएकोमा प्रश्न गर्नेहरुले अहिलेको निर्णयसंगै त्यसको जवाफ प्राप्त गरिसकेको नेकपाका एक सांसद बताए । ‘धेरै कुरा गर्ने बेला अहिले हैन, तर यसअघि मूख्यमन्त्रीलाई अपजस दिनेले थाहा पाए कि फलको स्वाद लिन पाक्नै पर्छ ।’–उनले भने–‘मूख्यमन्त्री ज्यूले राजधानी र नामकरणको आफ्नो जिम्मेवारी पुरा गर्नुभएको छ ।’ मूख्यमन्त्री पौडेललाई मूख्यमन्त्री पदसंग राजधानी काभ्रेसंग साटेको आरोप समेत लाग्दै आएको थियो । कतिपय अवस्थामा उनले आफुलाई पदको कुनै मोह नभएको स्पष्टिकरण समेत दिनुपर्ने अवस्था आएको भन्दै नेकपाका अर्का सांसदले भने समयले यसलाई प्रष्ट बनाई दिएको छ । 
आफ्नो कार्यकालमा आन्तिक पार्टी राजनीतिमा प्रतिकुल अवस्थामा प्रदेशको राजधानी हेटौँडा र नामकरण बागमतिलाई निर्णयमा पुर्याउँदा मूख्यमन्त्री पौडेलको राजनैतिक साख बढेको चर्चा राजनैतिक बृत्तमा समेत सघन बनेको छ ।
यो पनि पढ्नुस्
प्रदेश-३ मा नेपाली कांग्रेसको रणनीतिक जीत