नेकपाका ४ सांसद जो काभ्रेको मतदानमा तटस्थ रहे

२७ पुस, हेटौँडा । ३ नम्बर प्रदेशको राजधानीको मतदानका क्रममा आइतबार सत्तारुढ नेपाल कम्युनिष्ट पार्टी (नेकपा) काभ्रेका ४ सांसद तटस्थ रहेका छन् ।
प्रदेशसभामा प्रदेशको राजधानी काभ्रेको धुलिखेलमा मतदानका क्रममा ४ सांसद तटस्थ रहेका हुन् । काभ्रेको पक्षमा विवेकशिल साझा पाटीका सांसदहरुको ३ मत परेको थियो । त्यसको विपक्षमा नेकपा, नेपाली कांग्रेस, नेमकिपा, राप्रपा संयुक्त र राप्रपाको गरी १०१ मत परेको थियो । काभ्रको धुलेखेलको मतदानमा काभ्रेका प्रत्यक्ष निर्वाचित सांसद बसुन्धरा हुमागाई, लक्ष्मण लम्साल, रत्न ढकाल र चन्द्र लामा गरी ४ सांसद तटस्थ बसेका थिए । 
शुरुदेखि नै काभ्रेको पक्षमा लविङ गर्दै आएका उनीहरुले नेकपा सचिवालय बैठकको निर्णय नमान्ने भन्दै पार्टीका बैठक र संचारमाध्यममा धारणा राख्दै आएका थिए । दबाबका लागि उनीहरुले केही समय अघि काभ्रे राजधानी हुनुपर्ने भन्दै प्रदेशसभामा प्रस्ताव समेत दर्ता गरेका थिए । तर नेकपा प्रदेश संसदीय दलले नेकपा सचिवालयको निर्णय राजधानी हेटौँडा र नामकरण बागमतीमा अनिवार्य व्हिप जारी गरेपछि उनीहरु पार्टीको निर्णय मान्न बाध्य भएका थिए । काभ्रेको मतदान हुँदा उनीहरु ‘फेस सेभिङ’ का लागि तटस्थ बसेका थिए । हेटौँडाको पक्षमा भएको मतदानमा भने चारै जना सहभागी भएका थिए । 
हेटौँडाको पक्षमा संसदमा अनुपस्थित प्रेम तामाङ र विपक्षमा मतदान गरेका विवेकशिलका ३ सांसदबाहेक बाँकी १०५ जनाले नै मतदान गरेका थिए ।