मन्त्री नेपालले आन्दोलनकारीलाई सोधे–‘पुत्ला जलाएर के हुन्छ ?’

८ माघ, हेटौँडा । बागमती प्रदेशका उद्योग, पर्यटन, वन तथा वातावरण मन्त्री अरुण नेपालले पुत्ला जलाएर के हुन्छ भन्दै आन्दोलनकारीहरुलाई प्रश्न गरेका छन् । हेटौंडास्थित वन मन्त्रालयमा बुधबार प्रदेश वन ऐनको विरोधमा दोस्रो चरणको कार्यक्रम अन्तरगत ज्ञापनपत्र बुझाउन पुगेका सामुदायिक वन उपभोक्ता महासंघ प्रदेश समिति र वन समूहका प्रतिनिधिहरुलाई मन्त्री नेपालले यस्तो प्रश्न गरेका हुन् । 
सामुदायिक वन उपभोक्ता महासंघ बागमति प्रदेश समितिले वन ऐन जलाउनेदेखि वन ऐन जारी गर्न मूख्य भुमिका खेल्ने व्यक्तिहरुको पुत्ला जलाउनेसम्मको आन्दोलन घोषणा गरेकोमा उनले असन्तुष्टी पोख्दै आन्दोलनकारीहरुलाई सोधे–‘पुत्ला जलाएर के हुन्छ, फोटो राखेर जलाउने हैन ?’ उनले त्यसो भन्दा सभाहल हाँसोले गुञ्जिएको थियो । उनले वार्तामार्फत समस्या समाधान गर्नु राम्रो हुने भन्दै यस्ता आन्दोलनको कार्यक्रम घोषणा नगर्न आग्रह गरे । छलफलबाटै समस्या समाधान गर्न सकिने भन्दै उनले–‘पर्दा पछाडि पनि खेलाडी छन्, हामीले नजान्दा नजान्दै पर्दा पछाडिको खेलाडिको चंगुलमा पर्न सकिन्छ र अन्तिममा क्षति आन्दोलनबाट प्राप्त उपलव्धीलाई हुन्छ ।’ उनले यसरी अघि नबढ्न उनको चेतावनीपूर्ण सुझाव थियो । 
ज्ञापनपत्र बुझाउन पुगेका वन समूहका पदाधिकारीहरुले भने आफुहरु करको मारमा परिसकेकाले धैर्य गर्न सक्ने अवस्थामा नरहेको भन्दै छिटै वार्तामार्फत सामुदायिक वन समूहका समस्या ऐन संशोधनमार्फत सम्बोधन गर्न आग्रह गरेका थिए ।