सहिद दिवसमा राष्ट्रपति हेटौँडा आउने, यस्ता छन् साताव्यापी कार्यक्रम

File Photo

९ माघ, हेटौंडा । मकवानपुरमा सप्ताहब्यापी रुपमा मनाईन लागेको सहिद दिवसको विबिध कार्यक्रमको तयारी पूरा भएको छ । माघ १० गते बिहान ७ बजे सहिद सप्ताहको शुभारम्भ पद यात्रा गरेर कार्यक्रमको औपचारिक शुरुवात हुने भएको हो ।
बागमती प्रदेशका मुख्यमन्त्री एवम् सहिद स्मारक विकास समितिका अध्यक्ष डोरमणि पौडेलसहित हेटौंडाको बुद्धचोकबाट सुरु हुने पदयात्रामा सहिद स्मारकमा गएर सम्पन्न हुने जिल्ला समन्वय समिति मकवानपुरका प्रमुख एबम् स्मारक बिकास समितिका सदस्य रघुनाथ खुलालले जानकारी दिए । माघ १० गते नै ११ बजे मकवानपुरगढी दरवारमा २५७ औ विजय उत्सव मनाउने कार्यक्रम रहेको छ । मकवानपुर गढीमा पनि मुख्यमन्त्री पौडेलले झण्डोतोलन गर्नुका साथै सेतो हात्तिको मूर्ति अनावरण गर्ने कार्यक्रम रहेको छ ।
माघ ११ गते बिहान ८ बजे सहिद स्मारकमा बृहत रक्तदान कार्यक्रम, दिउँसो १२ः३० बजे कलेज स्तरिय वक्तृत्वकला प्रतियोगिता, माघ १२ गते जिल्लका विभिन्न जातजातीको मौलिकता झल्कने विविध सांस्कृतिक कार्यक्रम, माघ १३ र १४ गते दुई दिन नेपाल ललित कला प्रज्ञा प्रतिष्ठानद्धारा कला सृजना कार्यशाला आयोजना हुने भएको छ ।
माघ १४ गते राष्ट्रपति विद्यादेवी भण्डारीद्वारा सहिद स्मारकमा निर्माण भएको प्रजातान्त्रीक पार्कको समुद्घाटन गर्नुहुने कार्यक्रम रहेको छ । माघ १४ गते नै बिभिन्न २० वटा देशका राजदुतहरु समेत कार्यक्रममा सहभागी हुने स्मारक बिकास समितिले जनाएको छ । माघ १५ गते साहित्यीक गजल वाचन कार्यक्रम र माघ १६ गते मुल समारोह समितिद्धारा प्रभातफेरी तथा श्रद्धान्जली कार्यक्रम गरी सहिद सप्ताहको कार्यक्रम सम्पन्न गरिने भएको छ ।