कांग्रेसले बाँड्यो पञ्चकन्याका विद्यार्थीलाई न्यानो कपडा

१५ माघ, हेटौंडा । मकवानपुरको थाहा नगरपालिका वडा नम्बर १ टाहाखेलस्थित पञ्चकन्या आधारभूत विद्यालयका विद्यार्थीहरुलाई न्यानो कपडा वितरण गरिएको छ ।
जाडो मौसममा कठ्याङ्ग्रिदै विद्यालय जान बाध्य बालबालिकालाई लक्षित गरी नेपाली कांग्रेस थाहा नगर समितिको आयोजनामा भएको कार्यक्रममा कांग्रेस मकवानपुरका निवर्तमान सभापति रघुरमण न्यौपानेको संयोजनमा ट्रयाकसुट र शैक्षिक सामग्री वितरण गरिएको हो ।
कार्यक्रममा कांग्रेस मकवानपुरका निवर्तमान सभापति न्यौपानेले जाडो मौसममा न्यानो कपडाको अभावमा विद्यालय आउनेको संख्या घटेको र सहयोगको आवश्यक भएको जानकारी पाएपछि न्यानो कपडा वितरण गरिएको बताए । थाहा नगरपालिकाका उपप्रमुख खड्ग गोपालीले सामुदायिक विद्यालयमा शैक्षिक सुधार आवश्यक भएको औल्याउँदै नगरपालिकाले शैक्षिक सुधार र पूर्वाधार निर्माणमा विद्यालयलाई सहयोग गर्ने जानकारी दिए । 
विद्यालय व्यवस्थापन समितिका अध्यक्ष युद्धबहादुर थोक्करको अध्यक्षतामा भएको कार्यक्रममा कांग्रेस थाहा नगर समितिका सभापति योगेन्द्रमान श्रेष्ठ, काँग्रेसका युवा नेता प्रमोद जोशी, विद्यालयका प्रधानाध्यापक रमेशकुमार लामाले सार्वजनिक विद्यालयको शैक्षिक गुणस्तर वृद्धि चुनौतीपूर्ण बन्दै गएको बताए । कार्यक्रममा कांग्रेस थाहा नगर उपसभापति भरत गोपाली, सचिव राममाया खत्री, नेपाली कांग्रेस मकवानपुर–काठमाडौँ सम्पर्क समितिका सचिव केपी मैनालीलगायतले मन्तव्य व्यक्त गरेका थिए । 
२०३५ सालमा स्थापना भएको विद्यालयमा कक्षा ५ सम्म अध्यापन हुँदै आएको र ३१ जना विद्यार्थी अध्ययनरत छन् ।