हेटौंडा आउने सडक सुधार गर्न सांसदहरुको माग

१७ माघ, हेटौंडा । बागमती प्रदेशका प्रदेशसभा सदस्यहरुले हेटौंडा आउने सडक सुधार गर्न सरकारसंग माग गरेका छन् ।
शुक्रबारको प्रदेशसभा बैठकको शुन्य समयमा बोल्दै सांसद रजनी अमात्य जोन्छेले काठमाडौंबाट हेटौंडा आउने सडकको अवस्था निकै कमजोर रहेको बताईन् । उनले प्रदेश राजधानी आउने कमसेकम एउटा सडक स्तरीय बनाउनका लागि सम्बन्धित निकायको ध्यानाकर्षण समेत गराईन् । 
सांसद गणेश दुलालले पनि सडकको खाल्डाखुल्डीले निकै समस्या बनाएको बताए । उनले ज्येष्ठ नागरिकहरु कसरी यात्रा गर्छन् भन्दै सडक सुधारका लागि ध्यानाकर्षण गराए । सांसद योगेन्द्र राज संग्रौलाले हेटौंडा आउने सडक धेरै भएपनि एउटा पनि स्तरीय नभएको बताए । उनले जनताबाट राजधानी आउने बाटो यस्तो अवस्थामा हुनु नसुहाउँदो भएको गुनासो आएको भन्दै सुधारको माग गरे । 
साउनामा दम्पत्तिको मृत्युबारे छानविन गर्न माग
बैठकमा प्रदेशसभा सदस्यहरुले ललितपुरमा साउना बाथ गर्ने क्रममा हस्त गर्बुजा मगर दम्पत्तीको मृत्यु भएको घटनाको छानविनको माग गरेका छन् । सांसद छिरिङ दोर्जे लामाले साउना बाथमा ग्याँस गिजरका कारण मगर दम्पत्तिको मृत्यु र दामनस्थित होटलमा पनि पर्यटकको मृत्यु हुनुमा व्यवसायीको चरम लापरवाही भएको भन्दै छानविन र अनुगमनको माग गरे । सांसद मैया आछामीले साउना बाथमा दम्पत्ति मृत्यु प्रकरणमा आएको रिपोर्टप्रति आपत्ति जनाउँदै सत्यतथ्य छानविनका लागि प्रदेश सरकारसंग माग गरिन् । 
बैठकको शुन्य समयमा १४ जना सांसदहरुले धारणा राखेका थिए ।