मूख्यमन्त्रीको भोजबारे सांसदले सोधिन्–यो के पारा हो, के गर्नु खोज्नु भएको हो ?

१७ माघ, हेटौंडा । बागमती प्रदेशकी एक सांसदले मूख्यमन्त्री डोरमणी पौडेलले माघ १३ गते साँझ एभोकाडो होटलमा दिएको रात्रीभोजबारे प्रश्न उठाएकी छिन् । सांसद शोभा शाक्यले एउटा कामका लागि भनेर बोलाई अर्को कामको उपस्थितिमा हाजिरीमा गराएको भन्दै आपत्ति समेत जनाएकी हुन् ।
शुक्रबारको संसद बैठकमा बोल्दै उनले सांसदहरुलाई पठाएको एसएमएसमा मूख्यमन्त्री तथा मन्त्रीपरिषद कार्यालयबाट धन्यवाद ज्ञापनसहित रात्रीभोजको आयोजना हुने भएकाले उपस्थितिका लागि जानकारी गराएको उल्लेख भएको बताईन् । उनले मूख्यमन्त्री डोरमणी पौडेलले मन्तव्यका क्रममा प्रदेश प्रमुखसंगको परिचय कार्यक्रम भनेको बताईन् । तर हाजिरीका क्रममा ‘बागमति प्रदेशसरकारदारा गरिने योजनाहरुको कार्यान्वयन तथा अनुगमनको प्रभावकारीता लगायत अन्य विविध विषयमा छलफल गर्नका लागि माननीय मूख्यमत्री ज्यूले प्रदेशसभाको सम्पूर्ण माननयहरुसहितको बैठक बसी देहाय बमोजिम उपस्थिति भयो ।’ भनि हाजिर गराएको भन्दै उनले आपत्ति जनाईन् । उनले संसदमा सोधिन्–‘मूख्यमन्त्री ज्यू यो के पारा हो, यो के गर्न खोज्नु भएको हो ?’ उनले आफुलाई यसको जवाफ चाहिएको बताईन् ।
माघ १३ गते सुशासनसम्बन्धी विधेयकबारेको सैद्धान्तिक छलफल भएको र सोही साँझ मूख्यमन्त्रीले धन्यवाद दिन रात्रीभोजको आयोजना गरेको भन्दै सांसदहरुले आपत्ति जनाएका थिए । रात्री भोजमा २५ देखि ३० सांसदमात्रै पुगेको स्रोतले बतायो । सांसदहरुको आपत्तिसहितको खबर प्रष्ट खबरले प्रकाशित गरेको थियो ।

यो पनि पढ्नुस् : किन हुँदैछ सोमबार साँझ एभोकाडोमा मूख्यमन्त्रीको रात्रीभोज ?