कांग्रेस संसदीय दलका उपनेता गच्छदार निलम्बित, ३ मन्त्रीसहित १७५ विरुद्ध मुद्धा

२२ माघ, काठमाडौं । नेपाली कांग्रेस उपसभापति तथा संसदीय दलका उपनेता बिजयकुमार गच्छदार प्रतिनिधिसभा सदस्यबाट निलम्बनमा परेका छन् । अख्तियारले विशेष अदालतमा भ्रष्टाचार मुद्दा दायर गरेसँगै उनी स्वतः निलम्बनमा परेका हुन् । 
मुद्दाको अन्तिम किनारा नलागेसम्म सांसदको हैसियतमा संसदमा जान पाउने छैनन् । यसअघि, बालुवाटारस्थित सरकारी जग्गा व्यक्तिको नाममा गराउन भूमिका खेल्ने तत्कालीन ३ मन्त्री र ३ सचिवविरुद्ध अख्तियार दुरुपयोग अनुसन्धान आयोगले बुधबार भ्रष्टाचारको मुद्दा दायर गरेको थियो । सरकारी जग्गा व्यक्तिको नाममा बनाउन सहयोग पुर्याउने गरी नीतिगत निर्णय गराउने तत्कालीन मन्त्रीहरु विजयकुमार गच्छदार, चन्द्रदेव जोशी र डम्बर श्रेष्ठ, तत्कालीन सचिवहरु दिनेशहरि अधिकारी, दीप बस्न्यात र छविराज पन्तविरुद्ध भ्रष्टाचारको मुद्दा दायर भएको छ । 
मुद्दा दायर भएका गच्छदार, श्रेष्ठ, पूर्व सचिवहरु पन्त र दीप बस्न्यातसँग जनही ९ करोड ६५ लाख ७६ हजार, पूर्वमन्त्री चन्द्रदेव जोशी र पूर्वसचिव दिनेशहरि अधिकारीसँग जनही ७ करोड ८ लाख ४८ हजार रुपैयाँ बिगो दाबी गरिएको छ । अख्तियारले भ्रष्टाचारको मुद्दा दायर भएकोमध्ये १ सय १० जनालाई जग्गा जफत तथा जरिवानाको लागि पनि मुद्दा दायर गरिएको छ भने बाँकी ६५ जनाविरुद्ध भने जग्गा जफत गर्ने मागदाबी मात्रै गरिएको छ ।