स्ववियु निर्वाचन अनिश्‍चित

२३ माघ, काठमाडौँ । आगामी फागुन १४ गतेलाई घोषणा गरिएको त्रिभुवन विश्वविद्यालयको स्वतन्त्र विद्यार्थी युनियनको निर्वाचन अनिश्चित बनेको छ । विद्यार्थी संघ÷संगठनबीच सहमति नजुट्दा तोकिएको मितिमा निर्वाचन हुने सम्भावना टर्दै गएको समाचार कान्तिपुरमा छ ।
प्रमुख प्रतिपक्षी नेपाली कांग्रेस र उसको भ्रातृ संगठन नेपाल विद्यार्थी संघले निर्वाचनलाई विश्वविद्यालयको पदाधिकारी नियुक्तिसँग जोडेर छलफल अघि बढाएको छ । त्रिविमा रेक्टर र अन्य विश्वविद्यालयमा रिक्त उपकुलपति नियुक्तिपछि मात्रै स्ववियु निर्वाचनको प्रक्रिया अघि बढाउन कांग्रेसले माग गरेको हो । कांग्रेस निकट प्राध्यापक संघ र नेविसंघले त्रिविमा रेक्टर आफ्नो कोटाको व्यक्ति हुनुपर्ने अडान लिएका छन् । कार्यवाहक रेक्टर मानविकी संकायका डिन शिवलाल भुसालको संयोजकत्वमा स्ववियु निर्वाचन केन्द्रीय अनुगमन तथा समन्वय समिति बनेको छ । 
नेविसंघले रेक्टर नियुक्तिपछि मात्रै निर्वाचन समिति गठन गरेर निर्वाचनको कार्यतालिकालगायत तयारीको काम अघि बढाउन भनेको छ । कांग्रेस नेताहरूले सत्तारूढ नेकपा र प्रधानमन्त्री तथा कुलपति केपी शर्मा ओलीसँग रेक्टरमा आफू निकटको व्यक्ति नियुक्ति गर्न दबाब दिँदै आएका छन् । नेविसंघले समय नदिँदा सहमति गरेर कार्यतालिका सार्वजनिक गर्न नसकेको समितिका सदस्य सचिव गंगाबहादुर थापाले बताए ।