गच्छदारमाथिको मुद्धा राजनैतिक आग्रहले प्रेरित : शर्मा

२३ माघ, काठमाडौँ । नेपाली कांग्रेसले पार्टी उपसभापति विजय गच्छदारमाथि अख्तियार दुरुपयोग अनुसन्धान आयोगले बुधबार दर्ता गरेको भ्रष्टाचार मुद्दा राजनीतिक आग्रहले प्रेरित तथा बदनियतपूर्ण रहेको बताएको छ । 
विहिबार पार्टी कार्यालय सानेपामा भएको पत्रकार सम्मेलनमा प्रवक्ता विश्वप्रकाश शर्माले अख्तियारले दर्ता गरेको मुद्धामा राजनीतिक प्रतिशोध देखिएको बताए । उनले कांग्रेसका नेता र कार्यकर्तामाथि झुट्टा मुद्दा लगाउँदै हतोत्साही बनाउने क्रमको रुपमा व्याख्या गरेका छन् । कांग्रेसद्वारा जारी विज्ञप्तिमा सरकारले आफ्नालाई जोगाउने र अरुणलाई फसाउने नियता देखाएको भन्दै यसकै कडिको रुपमा अहिलेको मुद्धालाई लिएको छ । पार्टी पदाधिकारी र पूर्वपदाधिकारीको बैठकले यसलाई राजनीतिक बदनियतले प्रेरित ठहर गरेको कांग्रेसले जनाएको छ । 
मन्त्रिपरिषद्ले गरेको निर्णयमा प्रधानमन्त्री माधव नेपाल र डा.बाबुराम भट्टराईलाई उन्मुक्ति दिने मन्त्रिमाथि भने मुद्धा चलाउनु बदनियतपूर्ण भएको जनाईएको छ । यही प्रकृतिमा अरुलाई मुद्धा चलाउनु र नेकपा महासचिव विष्णु पौडेलले आफ्ना छोरा नवीन पौडेलका नाममा जग्गा लिएको तथ्यलाई वेवास्ता गर्दै उन्मुक्ति दिएको प्रति कांग्रेसले आपत्तिजनक भनेको छ । गच्छदारले यो मुद्दाको राजनीतिक र कानुनी दुबै ढंगले सामाना गर्ने समेत जनाईएको छ ।