प्रदेशसभामा ललिता निवासदेखि पशुपतिको झल्लरसम्मको चर्चा

२८ माघ, हेटौंडा । बागमती प्रदेशको प्रदेशसभा बैठकमा मंगलबार प्रदेशसभामा ललिता निवासदेखि पशुपतिको झल्लरसम्मको चर्चा चलेको छ । प्रदेशसभा भवन हेटौंडामा बसेको बैठकमा सांसदहरुले ललिता निवास जग्गा प्रकरणबारे चर्चा गरेका हुन् ।
बैठकमा बोल्दै प्रदेशसभा सदस्य मिना ज्ञवालीले ललिता निवास जग्गा प्रकरणका दोषीमाथि मुद्धा दायर गरेको प्रति सरकारलाई धन्यवाद दिईन् । बैठकमा प्रदेशसभा सदस्य रमेश पौड्यालले ललिता निवास प्रकरणमा कार्यकारी सरकारको छायाँमा अख्तियार परेको भन्दै अख्तियारको अहिलेको मुद्धा दायरको तरिकाले चोरेको सामान फिर्ता गर्ने छुट भन्ने गलत सन्देश गएको बताए । उनले सरकारवादी मुद्धा फिर्ता हुने अवस्था आएको पनि बताए । प्रदेशसभा सदस्य विजय श्रेष्ठ केसी र रजनी अमात्य जोन्छेले भ्रष्टाचारीलाई कारवाही हुनुपर्ने बताउँदै पूर्वाग्रही प्रवृत्तिको विरोध गरे । उनीहरुले ललिता निवास प्रकरणमा तत्कालिन मन्त्री विजयकुमार गच्छदारलाई मुद्धा लाग्दा पूर्व प्रधानमन्त्री माधवकुमार नेपाल र डा. बाबुराम भट्टराईलाई किन मुद्धा दर्ता भएन भन्दै प्रश्न गरेका थिए । 
सांसद नरोत्तम बैद्यले पशुपतिनाथ ‘सोसलिष्ट’ को संज्ञा दिए । सादा ‘सोसलिष्ट’ शैली को पशुपतिमा सुनको झल्लर राखेर सामान्ती बनाउने प्रयास भईरहेको भन्दै विरोध गरे । बैठकमा सांसदहरुले विकास बजेट खर्च नभएको भन्दै आपत्ति जनाए । स्थानीय तहमा भ्रष्टाचार बढिरहेको र यसको निगरानी गर्ने सार्वजनिक लेखा समितिलाई बास्तविक मर्म अनुसार गठन नगरिएको समेत आवाज उठेको थियो ।