नयाँ क्रियाशिल सदस्य वितरण गर्ने कांग्रेसको निर्णय

१ फागुन, काठमाडौँ । नेपाली कांग्रेसले हरेक वडा तहमा ५० प्रतिशत नयाँ क्रियाशिल सदस्यता थप वितरण गर्ने निर्णय गरेको छ । केन्द्रीय कार्यसमितिको बुधबार बसेको बैठकले यस्तो निर्णय गरेको हो । 
बैठकले वडा कार्य समिति र क्षेत्रीय कार्यसमितिका लागि आवश्यक पर्नेसम्म क्रियाशिल सदस्यता वितरण खुला गर्ने निर्णय गरेको छ । प्रत्येक वडामा जनसंख्याको बनोटलाई आधार बनाएर समानुपातिक हिसाबले वितरण गर्ने निर्णय बैठकले गरेको प्रवक्ता विश्वप्रकाश शर्माले बताए । प्रवक्ता शर्माले गत पुस ११ गतेको बैठकले अधिवेशनसम्मका लागि विधानका केही धारा निलम्बन गर्ने भनि गरेको निर्णय बुधबारको बैठकले सर्वसम्मतिले पारित गरको बताए ।
कांग्रेसले आगामी वर्षको फागुनमा हुने पार्टीको महाधिवेशनको कार्यतालिका पनि केही हेरफेर गरेको छ। प्रवक्ता शर्माका अनुसार फागुन १५ गतेभित्र समायोजन गर्न जिल्लाहरुलाई निर्देशन दिएको छ । कांग्रेसले फरक राजनीतिक आस्था राख्‍ने व्यक्तिहरुमाथि पूर्वाग्रह राखी सुनियोजित रुपमा झूठा मुद्दा लगाउने, संविधानको मर्म र भावना विपरितका विधेयक ल्याउने सरकारी निर्णयको भर्त्सना गर्दै चरणबद्ध विरोधका कार्यक्रम संचालन गर्ने पनि निर्णय गरेको समाचार कान्तिपुरमा छ ।