प्रदेशसभाको कार्यप्रणाली र सहभागिताबारे अन्तरक्रिया

१ फागुन, हेटौंडा । डेमोक्रेसी रिर्सोस सेन्टरको आयोजनामा विहिबार हेटौंडामा ‘प्रदेशसभाको कार्यप्रणाली र सहभागिता’बारे अन्तरक्रिया भएको छ । 
अन्तरक्रिया कार्यक्रममा केन्द्रका अनुसन्धाता अरुना लिम्बु र आलोक पोखरेलले ७ वटै प्रदेशमा गरेको अनुसन्धान गरेर तयार पारेको प्रतिवेदनमाथि छलफल भएको थियो । अनुसन्धानले अन्य प्रदेशको तुलनामा बागमती प्रदेशको प्रदेशसभामा महिला तथा समानुपातिक सांसदहरुको छलफलमा रहने सहभागितामा दलबाट विभेद नगरिएको र उनीहरुले प्रदेशसभामा आफ्नो धारणा राख्ने प्रवृत्ति सकारात्मक रहेको देखाएको छ । शुन्य र विशेष, सैद्धान्तिक र दफावार छलफलमा पनि पुरुष र प्रत्यक्ष निर्वाचित सांसद सरह नै महिला र समानुपातिक सांसदहरुको सहभागिता रहेको अध्ययनले देखाएको छ । 
छलफलमा प्रदेशसभा सदस्य छिरिङ दोर्जे लामा, न्हुक्षेनारायण श्रेष्ठ, मुनु सिग्देल, रमेश पौड्याल, विराजभक्त श्रेष्ठ, जुनेली श्रेष्ठ, रजनी अमात्य जोन्छे, विजया श्रेष्ठ केसी, भीमसेन खत्री लगायतले प्रदेशसभामा आफ्नो अनुभव र आगामी दिनमा सुधार्नुपर्ने पक्षबारे धारणा राखेका थिए । 
कार्यक्रममा संचारकर्मी र प्रदेशसभा सचिवालयका कर्मचारीले अहिलेसम्मको अभ्यास र यसमा सुधार्न सकिने पक्षबारे सुझाव दिएका थिए ।