सांसदले सोधे-'छाडा छोडिएका गाई र पशुचौपायाको व्यवस्थापन कसरी हुँदैछ ?'

११ फागुन, हेटौंडा । प्रदेशसभा सदस्य छिरिङदोर्जे लामाले काठमाडौं लगायतका जिल्लामा छाडा गाई र पशुचौपायाको व्यवस्थापन कसरी गर्दै छ भन्दै प्रश्न गरेका छन् ।
प्रदेशसभाको प्रश्नोत्तर कार्यक्रममा कांग्रेस सांसद छिरिङदोर्जे लामाले सडकमा छाडा छोडिएका गाई, बाछा र पशुचौपायाको व्यवस्थाबारे प्रश्न गरेका हुन् । उनले काठमाडौं लगायतका जिल्लामा छाडा गाई र पशुचौपायाका कारण समस्या देखिएको भन्दै राष्ट्रिय जनावरको संरक्षणमा के काम गरिरहेको छ ? भन्दै प्रश्न गरे ।
जवाफमा भूमि व्यवस्था कृषि तथा सहकारी मन्त्री दावादोर्जे लामाले यो समस्याप्रति सरकारको ध्यानाकर्षण भएको बताए । उनले पशुचौपायाको ५ वटा स्वतन्त्रता संरक्षणका लागि अल्पकालिन र दिर्घकालिन योजना अघि सारेको बताए । उनले अल्पकालिन योजना अनुसार व्यवस्थित बासका लागि स्थानीय तहको ५० प्रतिशत लगानीमा टोखा र बुढानिलकण्ठमा कान्जी हाउस निर्माण गर्ने बताए । 
उनले पशुपतिको वनकाली र देशका अन्य क्षेत्रमा पनि कान्जी हाउस निर्माणको काम अघि बढाउने बताए । उनले यस्तो कामका लागि परोपकारी संस्थाको पहिचान गर्ने समेत उनले बताए । यसअघि मूख्यमन्त्री डोरमणी पौडेलले प्रदेशसभा सदस्य रमेश पौडेलको प्रश्नोत्तरको लिखित उत्तर संसदमा पेश गरेका थिए ।