बास्कोटाको ‘कमिसन’ प्रकरणबारे सांसदले उठाए आवाज

११ फागुन, हेटौंडा । सेक्युरिटी प्रिन्टिङ प्रेस खरिदमा तत्कालिन संचारमन्त्री गोकुल बास्कोटाको ‘कमिसन’ प्रकरणबारे बागमती प्रदेशसभामा संसदहरुले आवाज उठाएका छन् । प्रदेशसभामा आइतबार विशेष समयमा बोल्ने प्रतिपक्षी सांसदहरुले यसबारे प्रश्न गर्दै सरकार भ्रष्टाचारमा डुबेको आरोप लगाएका हुन् ।  
बैठकमा नेपाली कांग्रेसकी प्रमुख सचेतक राधा घलेले वर्तमान सरकार भ्रष्टाचारबाट ग्रसित भएको भन्दै भनाई र गराईमा फरक देखिएको बताईन् । उनले सेक्युरिटी प्रिन्टिङ प्रेस खरिदमा तत्कालिन मन्त्री नै कमिसनको खेलमा लागेको भन्दै छानविनको माग गरिन् । उनले वर्तमान सरकार विकास निर्माणमा भन्दा पनि संस्थागत रुपमै नीतिगत भ्रष्टाचारमा डुबेको बताइृन् । अर्का प्रदेशसभा सदस्य दिपेन्द्र श्रेष्ठले सरकार पूर्वाग्रही ढंगबाट अघि बढेको उदाहरणको रुपमा ललित निवास प्रकरणलाई प्रस्तुत गरे । उनले सरकारले आफ्नालाई छोड्ने र अरुलाई मुद्धा लगाउने कामगरेको भन्दै विरोध गरे । सांसद रमेश पौडेलले सेक्युरिटी प्रेस खरिद प्रकरणमा ७० करोड कमिसनमा मुछिएका बास्कोटाबारे निष्पक्ष छानविनको माग गरे । उनले राष्ट्रसेवक कर्मचारीप्रति अमर्यादित शव्द बोलेको भन्दै आपत्ति समेत जनाए । 
बैठकमा नेकपा सांसद दीपक निरौलाले सेक्युरिटी प्रिन्टिङ प्रेस खरिद प्रकरणमा बास्कोटामाथि निराधार आरोप लगाईएको बताए । उनले अडियोमा आवाज क्यारिकेचर गरिएको हुन सक्ने दावि समेत गरे । उनले बास्कोटाले ‘नैतिकताको आधारमा दिएको राजिनामा’ ले अनुसन्धानलाई सहयोग गर्ने बताए ।