मगर संघको ३८ औं स्थापना दिवसमा रक्तदान

१३ फागुन,हेटौँडा। नेपाल मगर युवा संघ,नेपाल मगर महिला संघ र नेपाल मगर सांस्कृतिक संघ मकवानपुरको संयुक्त आयोजनामा रक्तदान कार्यक्रम हुने भएको छ । 
नेपाल मगर संघले मंगलबार पत्रकार सम्मेलनको आयोजना गर्दै मगर  संघको ३८ औं स्थापना दिवसको अवसरमा यही फागुन १५ गते विहीबार रक्तदान कार्यक्रमको आयोजना गर्न लागिएको जानकारी गराइएको हो । 
कार्यक्रम १५ गते विहीबार विहान ७ बजे बुद्धचोकमा हुने नेपाल मगर युवा संघ मकवानपुरका अध्यक्ष उपेन्द्र राना मगरले जानकारी दिए । विभिन्न समयमा रचनात्मक कार्यक्रम गर्दै आएको मगर संघले रगतको अभाव हुन नदिन रक्तदान कार्यक्रमको आयोजना गर्न लागिएको अध्यक्ष मगरले बताए । यसैगरी मगर संघको स्थापना दिवसको अवसरमा हेटौंडा उपमहानगरपालिका वडा नम्बर १२ मा रहेको प्रथम सहिद क्याप्टेन लखन थापा स्मृति बाटिकामा सांस्कृतिक कार्यक्रमको आयोजना हुने अध्यक्ष भुपेन्द्र राना मगरले जानकारी दिए । सांस्कृतिक कार्यक्रम नेपाल मगर संघ हेटौंडा नगर समितिको आयोजना एवम प्रथम सहिद लखन थापा स्मृति बाटिकाको संयोजनमा हुने उनले जानकारी दिए । पत्रकार सम्मेलनमा नेपाल मगर संघ मकवानपुरका जिल्ला सचिव सन्देश तुम्सिङ मगर, नेपाल मगर महिला संघकी जिल्ला अध्यक्ष डेमिजा थापा मगर र नेपाल मगर संघ हेटौंडा नगर समितिका सविच सुवास थापा मगरको उपस्थिति रहेको थियो ।