मकवानपुरमा विदेशबाट फर्किएका ३ सय १, कति कहाँ छन् ?

सांकेतिक तस्विर

१७ चैत, हेटौंडा । मकवानपुरमा विदेशबाट फर्किएकाको संख्या ३ सय १ रहेको  छ । विभिन्न देशमा कामका लागि काम, अध्ययन एवं अन्य प्रयोजनका लागि गएर फर्किएकाहरुको संख्या ३ सय १ रहेको जिल्ला प्रशासन कार्यालय मकवानपुरले जनाएको हो । 
चैत १६ गतेसम्मको तथ्यांक अनुसार सबैभन्दा बढि विदेशबाट फर्कनको संख्या हेटौंडा उपमहानगरपालिकामा छ भने सबैभन्दा कम राक्सिराङ गाउँपालिकामा रहेको छ । हेटौंडा उपमहानगरपालिका क्षेत्रमा विदेशबाट आएकाहरुको संख्या १ सय २८ रहेको छ भने थाहा नगरपालिकामा ६७ रहेको छ । त्यस्तै, कैलाश गाउँपालिकामा ५, इन्द्रसरोबरमा १६, भीमफेदी गाउँपालिकामा १२, मनहरी गाउँपालिकामा ४८, राक्सिराङ गाउँपालिकामा १, मकवानपुरगढी गाउँपालिकामा ५, बकैया गाउँपालिकामा ५ र बागमती गाउँपालिकामा ११ जना रहेका छन् ।
विदेशबाट आएका सबै ३ सय १ जनाको नै प्रारिम्भक स्क्रिनिङ गरिएको र उनीहरुको स्वास्थ्य अवस्था समान्य रहेको छ । प्रशासनका अनुसार चैत १६ गतेसम्म हेटौंडा नगरमा रहेका २ जना आईसोलेसनमा छन् भने बाँकी होम क्वारेन्टाईनमा छन् । बागमती गाउँपालिकाका एक जना काठमाडौंमा क्वारेन्टाईनमा बसेर आएका छन् । बाँकी सबै होम क्वारेन्टाईनमा रहेको मकवानपुरका प्रमुख जिल्ला अधिकारी दीपकराज नेपालले बताए । 
विदेशबाट फर्किएका प्रायः सबै होम क्वारेन्टाईनमा रहेकाले प्रशासनले होम क्वारेन्टाईनमा निगरानी बढाउने निर्णय समेत गरेको छ । होम क्वारेन्टाईनमा बसेकाहरु सामान्य अवस्थामा झैं हिडडुल गरेको गुनासो स्थानीयहरुले प्रशासन, सुरक्षा निकाय र संचारकर्मीहरुसंग गर्ने गरेकाले निगरानी बढाउन लागिएको जनाईएको छ ।