बागमती प्रदेशमा यसकारण बढ्यो मूख्यमन्त्री र मन्त्रीबीच दुरी

१७ चैत, हेटौंडा । बागमती प्रदेशमा मूख्यमन्त्री डोरमणी पौडेल र मन्त्रीहरुबीच अचानक दुरी बढेको छ । त्यो दुरी मूख्यमन्त्री र मन्त्रीमा मात्रै नभई मन्त्री–मन्त्रीको बीचमा पनि बढेको देखिएको हो । 
राजनैतिक क्षेत्रमा प्रायः गुट, उपगुटका कारण नेताहरुबीच दुरी बढ्ने गरेको पाईन्छ । अधिकांश अवस्थामा व्यक्तिगत स्वार्थ समेत दुरी बढ्नुमा देखिने गरेको छ । तर बागमती प्रदेशका मूख्यमन्त्री र मन्त्रबीचको दुरी न कुनै नकारात्मक कारणले बढेको हो न व्यक्तिगत कारणले नै । मूख्यमन्त्री र मन्त्रीहरुबीचको दुरी कोरोना संक्रमणको जोखिम रोक्नका लागि बढेको हो । 
सधैं कोठामा राउण्ड टेबलमा नजिकै बसेर मन्त्रीपरिषद बैठक संचालन गर्ने गरेका मूख्यमन्त्री डोरमणी पौडेलले आइतबारको मन्त्रीपरिषद बैठक भने दुरी कायम गरेर संचालन गरेका छन् । विश्व स्वास्थ्य संगठनले पनि दुरी कायम गर्न सक्दा कोरोनाको संक्रमणको जोखिम नरहने बताईरहँदा बागमती प्रदेश सरकारको मन्त्रीपरिषदको बैठक पनि मूख्यमन्त्रीदेखि मन्त्रीसम्म दुरी कायम राखेर गरिएको थियो । 
यसपालीको बैठक कोठामा नभई खुल्ला जमिनमा तयार गरिएको टेन्टमा भयो । बैठकले कोरोना भाईरस सङ्क्रमण, नियन्त्रण तथा उपचार सहयोग कार्यबिधी २०७६ स्वीकृत गरेको छ भने प्रदेशको अवस्थाबारे समिक्षा समेत गरेको छ । यो संगै कोरोना विरुद्धको अभियानका लागि प्रदेशका स्थानीय तहहरुमा रकम निकासा समेत हुने भएको छ ।