अध्यक्ष चौलागाईले भने–‘वडाका श्रमिक र विपन्न भोकै बस्नुपर्दैन’

१८ चैत, हेटौंडा । हेटौंडा वडा नम्बर ६ का वडा अध्यक्ष अर्जुनप्रसाद चौलगाईले वडाका श्रमिक र विपन्न समुदाय भोकै बस्नु नपर्ने बताएका छन् । 
लकडाउन लम्बिएपछि डेरामा रही दैनिक ज्यालादारी गरी खाने र विपन्न समुदायमा समस्या परेको भन्दै उनले हेटौंडा ६ नम्बर वडामा त्यस्ता वर्गलाई व्यक्तिगत रुपमै पनि सहयोग गर्ने र भोकै बस्नु नपर्ने बताएका हुन् । उनले एक दुईदिनमै त्यस्ता परिवारमा राहत पुग्ने बताउँदै उनले टोल विकास वडा समन्वय समितिले उपलव्ध गराएको विवरण अनुसार राहत उपलव्ध गराउने जानकारी दिए । 
‘दुईछाक टार्न ज्याला मजदुरी गर्ने, अति विपन्न परिवारलाई पहिलो चरणमा राहत वितरण गर्ने तयारी गर्दैछु ।’–उनले भने–‘व्यक्ति रुपमा खर्च गरेरै भएपनि राहत वितरण गर्छु ढुक्क हुनुस् ।’ हेटौंडा उपमहानगरपालिकालाई पनि राहत उपलव्ध गराउन आग्रह गर्ने बताउँदै वडा अध्यक्ष चौलागाईले आफ्नो व्यक्तिगत प्रयासबाट पनि वडाभरी राहत वितरण गर्ने बताउँदै सहयोग हातहरुलाई पनि सम्पर्क गर्न उनले आग्रह गरे । अहिले कसले देला र बाँडौंला भनेर कुर्ने बेला नभएको बताउँदै उनले आफैं खर्च गरेर राहत वितरण गर्न अघि बढ्ने बाए ।
वडा समन्वयले बुझायो विवरण
टोल विकास संस्था हेटौंडा ६ नम्बर वडा समन्वय समितिले वडाभरी रहेका श्रमिक र विपन्न परिवारको राहत संकलन गरेको छ । लकडाउनका कारण दुईछाक टार्नै समस्यामा रहेका उनीहरुको लगत टोल विकास संस्थाहरुको समन्वयमा संकलन गरेको सचिव विजय पौडेलले जानकारी दिएका छन् । टोल विकास वडा समन्वय समितिले सोमबार र मंगलबार संकलन गरेको नामावलीसहितको विवरण वडा अध्यक्ष अर्जुनप्रसाद चौलागाईलाई बुझाएको पौडेलले जानकारी दिए । पौडेलले वडामा रहेका २३ टोल विकास संस्थाको समन्वयमा विवरण संकलन गरेको उनको भनाई छ ।