मूख्यमन्त्रीलाई पारदर्शितामा ध्यान दिन लेखासमिति सभापतिको सुझाव

२७ चैत, हेटौंडा । बागमती प्रदेश अन्तरगत संसदको सार्वजनिक लेखा समितिका सभापति न्हुक्षेनारायण श्रेष्ठले कोरोनाविरुद्धको अभियानमा पारदर्शिता र प्रभावकारितालाई ध्यान दिन प्रदेश सरकारलाई सुझाव दिएका छन् ।
विहिबार मूख्यमन्त्री डोरमणी पौडेलसंगको भेटमा सभापति श्रेष्ठले कोरोनाविरुद्धको अभियान अन्तरगत स्वास्थ्य लगायतका सामग्री खरिद र राहत वितरणका क्रममा पारदर्शिता र प्रभावकारितालाई ध्यान दिन सुझाव दिएका हुन् । उनले संघीय सरकारले गरेको स्वास्थ्य सामग्री खरिदबारे नागरिक तहमा आवाज उठेको भन्दै प्रदेश सरकारले त्यसबाट पाठ सिक्नुपर्ने श्रेष्ठको भनाई थियो ।
भेटमा मूख्यमन्त्री पौडेलले आफु परदर्शिता र प्रभावकारिताको विषयमा सचेत रहेको भन्दै गरेका गतिविधिलाई बेभसाईटमै राख्ने व्यवस्था मिलाएको जानकारी दिए । उनले अहिलेसम्म कुनै पनि बजेट रकमान्तर नगरिएको भन्दै मूख्यमन्त्री पौडेलले लेखा समिति सभापतिबाट प्राप्त सुझावलाई सकारात्मक लिएको बताएका थिए ।
लेखा समिति सभापति श्रेष्ठले भौतिक पूर्वाधार विकास मन्त्री रामेश्वर फुँयालसंग पनि पारदर्शिता र प्रभावकारिताबारे छलफल गरेका थिए । उनले विकास बजेट खर्चको अवस्था लगायतको बारेमा समेत जानकारी लिएका थिए ।