बानियाँ रकम सहयोग गर्ने, खतिवडा साक्षी बस्ने

गाउँपालिका अध्यक्ष मुक्तानलाई रकम हस्तान्तरण गर्दै सांसद बानियाँ, साथमा सांसद खतिवडा

२७ चैत, हेटौंडा । बागमती प्रदेशका प्रमूख प्रतिपक्षी दलका नेता एवं कांग्रेस मकवानपुरका सभापति ईन्द्रबहादुर बानियाँले मकवानपुरको पश्चिमी क्षेत्रस्थित कैलाश गाउँपालिकालाई कोरोनाविरुद्ध अभियानका लागि २ लाख रुपैंया हस्तान्तरण गरेका छन् ।

नेता बानियाँले गाउँपालिका अध्यक्ष टंक मुक्तानलाई बिहिबार २ लाख रुपैंयाको चेक हस्तान्तरण गरेका हुन् । मकवानपुर क्षेत्र नम्बर २ (ख) का सांसद समेत रहेका बानियाँले विश्व महामारीको रुपमा रहेको कोरोनाविरुद्ध लड्न दलगत स्वार्थ भन्दा माथि उठेर काम गर्नुपर्ने भन्दै यथाशिघ्र पूर्व तयारी र विपन्न समुदायलाई एकद्वार प्रणालीमार्फत राहत वितरणमा मद्धत पुगोस् भनेर सहयोग गरेको बताए । 

बानियाँद्वारा रकम हस्तान्तरण गरेपछि बोल्दै मकवानपुर क्षेत्र नम्बर २ का संघीय सांसद विरोध खतिवडाले विकट गाउँपालिकाहरुमा स्वास्थ्य सामाग्री नआईपुगेको कारण समस्या परेकोले आफूले संघीय र प्रदेश सरकारलाई ध्यानाकर्षण गराउने बताउनुभयो । कैलाश गाउँपालिका अध्यक्ष मुक्तानले आफूले गाउँपालिकाको विभिन्न ४ स्थानमा क्वारेनटाइन वार्ड राख्ने प्रयास गरेपनि स्वास्थ्य सामाग्री अभावका कारण अफ्ठ्यारो परेको बताए ।

कैलाश गाउँपालिकाको क्वारेनटाइन वार्ड निरीक्षण तथा रकम हस्तान्तरण कार्यक्रममा कांग्रेस जिल्ला सदस्य दीपेन्द्र मल्ल, कांग्रेस २ ख क्षेत्रीय सभापति लोकबहादुर मुक्तान, कैलाश ३ नम्बर वडा अध्यक्ष देवलाल बल, संचारकर्मी शिवकुमार काशी, सुजन विडारी, गाउँपालिकाका कार्यकारी अधिकृत रामप्रसाद शर्मा, कैलाश गाउँपालिकाका स्वास्थ्यचौकी प्रमुख श्यामसुन्दर महतोलगायतको उपस्थिति रहेको थियो ।