बस्तिपुर जेसीज हाँडीखोलाले दियो वडा कार्यालयलाई २० हजार

२८चैत, हेटौंडा। देश अहिले लकडाउनको चपेटामा परेको छ। लकडाउनका कारण दैनिक ज्याला मजदुरी गर्ने मानिसलाई समस्या परेको छ। समस्यामा परेका मानिसलाई विभिन्न संघसंस्थाले सहयोग गर्ने कामलाई निरन्तरता दिइरहेका छन्।

यसै क्रममा बस्तिपुर जेसीज हाँडीखोलाले कोरोना भाइरसका कारण समस्यामा परेकाहरुलाई सहयोग गर्ने अभियान सुरु गरेको छ। जेसिजले शुक्रबार बिहान हेटौंडाको १९ नम्बर वडालाई नगद २० हजार रुपैयाँ सहयोग गरेको हो ।

वडाको लागि आवश्यक सामग्री खरिदको लागि नगद सहयोग गरिएको कार्यकारिणी उपाध्यक्ष गणेश दर्पण अधिकारीले जानकारी दिए । सहयोग रकम जेसीजमा आबद्ध सदस्यहरुसँगबाट संकलन गरीएको उपाध्यक्ष अधिकारीले बताए ।
बस्तिपुर जेसीजको कार्यक्षेत्र मकवानपुरको मनहरी गाउँपालिका, हेटौंडाको १९ नम्बर र ३ नम्बर वडा रहेको छ । अब मनहरी गाउँपालिका र ३ नम्बर वडालाई नगद आर्थिक सहयोग गरिने बस्तिपुर जेसीज हाँडीखोला बर्ष सन् २०२० का अध्यक्ष जयराम सुबेदीले बताए ।
“युवाहरुको अन्तरास्ट्रिय संस्था जेसीज र यसमा आबद्ध हामी यो महामारीको अवस्थामा चुप लागेर बस्ने कुरा भएन“, अध्यक्ष सुबेदीले भने, “हाम्रो कार्यक्षेत्र अन्तर्गतको १९ नम्बर वडालाई सहयोग गर्यौं, मनहरी गाउँपालिका र ३ नम्बर वडालाई एकदुइ दिन भित्रै सहयोग हस्तान्तरण गर्नेछौं ।“ 
सहयोग हस्तान्तरण कार्यक्रममा १९ नम्बर वडा अध्यक्ष नरनाथ सुवेदी (नवराज) ले बिपदको अवस्थामा सहयोग एवम् सहाकार्य गरेको भन्दै खुसी ब्यक्त गरे । सबैको सहयोग र समन्वय भएमा स्थानीय तहलाई काम गर्न अझै सहज हुने उनको भनाई थियो । 
सहयोग हस्तान्तरण कार्यक्रममा वडा सदस्यहरु इन्दिरा तामाङ, शान्ति विश्वकर्मा, वडा सचिव बसन्तकुमार सिटौलासहित स्थानीय राजनीति दलका प्रमुख प्रतिनिधि, विभिन्न सामाजिक संघ संस्थाका प्रमुख प्रतिनिधि र जेसीजका पदाधिकारीको उपस्थिति थियो ।