प्रदेश २ मा यस्तो छ राहतको ‘जम्बो प्याकेज’

२८ चैत, हेटौँडा । प्रदेश २ सरकारले कोरोना भाइसरको रोकथामा र लकडाउनले किसान र सर्वसाधरणलाई राहतको ‘जम्बो प्याकेज’ सहितको निर्णय गरेको छ ।
प्रदेश नम्बर २ को सरकारको शुक्रबार बसेको मन्त्री परिषदको बैठकले कोरोनाभाइरसको रोकथाम, नियन्त्रण तथा उपचारमा खटिरहेकाहरुको भाइरसको संक्रमणबाट मृत्यु भएमा पीडित परिवारलाई प्रदेश सरकारले ५० लाख रुपैयाँ राहत दिने निर्णय गरेको छ । त्यसैगरी लकडाउनको अवधिमा किसानहरु पीडित भएकाले भन्दै किसानहरुले बैङ्क, वित्तीय संस्था वा सहकारीबाट लिएको ऋणको ४ महिनाको ब्याज प्रदेश सरकारले तिरिदिने निर्णय गरेको प्रदेश २ सरकारका प्रवक्ता एवं आन्तरिक  मामिला तथा कानूनमन्त्री ज्ञानेन्द्रकुमार यादवले बताए । 
कोरोना नियन्त्रणका लागि नियन्त्रण, रोकथाम तथा उपचारकार्यमा संलग्न हुने निजामति वा अन्य कर्मचारी, सरकारी, गैरसरकारी वा निजी क्षेत्रका स्वास्थ्यकर्मी, एम्बुलेन्स चालक, सहयोगी स्वास्थ्यकर्मी, वा अन्य कर्मचारी तथा पदाधिकारीको कोरोनाको संक्रमण भइ मृत्यु भए पीडित परिवारलाई ५० लाख रुपैयाँ राहत दिने निर्णय भएको प्रवक्ता एवं मन्त्री यादवले बताए । 
उनले प्रदेश भित्रका किसानले कृषि कर्मको लागि ५ लाख रुपैयाँसम्म लिएको ऋणमा अधिकतम १२ प्रतिशत सम्मका ऋणको ब्याज कृषि सहकारी तथा भूमि व्यवस्था मन्त्रालयको सिफारिसमा प्रदेश सरकारले तिरिदिने निर्णय भएको बताए ।