महोत्सवको बजेट कोरोना सचेतनामा खर्चन सांसद लामाको सुझाव

२८ चैत, हेटौंडा । नेपाली कांग्रेस बागमती प्रदेश संसदीय दलका सचिव निमा लामाले नेपाल भ्रमण बर्षको प्रचारका लागि मेला महोत्सवमा खर्च गर्ने भनिएको बजेट कोरोनाको सचेतनामा खर्च गर्न सुझाव दिएका छन् । 
शुक्रबार उद्योग, पर्यटन, वन तथा वातावरण मन्त्री अरुण नेपालसंग टेलिफोन कुराकानी गर्दै सिन्धुपाल्चोक क्षेत्र नम्बर २ (२) का सांसद लामाले नेपाल भ्रमण बर्ष नै स्थगित भईसकेको अवस्थामा यसका लागि चालु आवमा छुट्टाईएको मेला महोत्सवको बजेट कोरोनाबारे सचेतना र जनताको सुरक्षामा खर्च गर्न सुझाव दिएका हुन् । प्रदेश सरकारले भ्रमण बर्षको प्रचारका लागि प्रत्येक निर्वाचन क्षेत्रलाई ५/५ लाख रुपैंया बजेट विनियोजन गरेको भन्दै उनले यो बजेट कोरोनासम्बन्धी सचेतना र जनताको सुरक्षाका लागि प्रदेश सांसदसहित परिचालन गरी खर्चिन सुझाव दिए । ‘पहिला नागरिकको सुरक्षा, त्यसपछि मात्रै पर्यटन प्रवद्र्धन गर्ने हो’,–उनले भने । 
कुराकानीमा मन्त्री नेपालले सांसद लामाको सुझाव सकारात्मक रहेको बताए । उनले भ्रमण बर्षको कार्यक्रम संचालन गर्ने अवस्था नरहेको भन्दै स्थगित भएको बताए । उनले अहिलेसम्म बजेट रकमान्तरको काम नभएको भन्दै कानूनी प्रक्रिया बुझेर अघि बढ्नुपर्ने अवस्था रहेको बताए । कोरोना संक्रमणको जोखिम रोक्ने अभियानमा प्रदेश सरकारले काम गरिरहेको समेत उनले बताए ।