सनसिटीका २ मा कोरोना, अपार्टमेन्टका सबैको परीक्षण शुरु

२ बैशाख, काठमाडौं । काठमाडौंको पेप्सीकोलास्थित सनसिटी अपार्टमेन्टका कोरोना संक्रमणको आशंका गरिएका ३ जना मध्ये २ जनामा कोरोनाको पुष्टि भएको छ । कोरोना पुष्टि भएसंगै अपार्टमेन्टमा बस्ने सबैको स्वास्थ्य परीक्षण शुरु भएको स्वास्थ्य तथा जनसंख्या मन्त्रालयले जनाएको हो । 
र्यापिड टेस्टमा कोरोना संक्रमण भएको देखाएपछि उनीहरुलाई पाटन अस्पताल भर्ना गरिएको थियो । पिसिआर मेसिनबाट थप परीक्षणका लागि उनीहरुको स्वाब (खकार) सोमबार राष्ट्रिय जनस्वास्थ्य प्रयोगशाला टेकु पठाईएको थियो । प्रयोगशालामा परीक्षणमा २ जनामा कोरोना संक्रमण भएको पाईएको छ । ५८ वर्षीय पुरुष र ८१ वर्षीया महिलामा कोरोना पोजेटिभ देखिएको र एक जनाको रिपोर्ट आउँन बाँकी छ । अस्पतालमा रहेका तीनै जनाको स्वास्थ्य अवस्था सामान्य रहेको र कोरोनामा यसअघि भनिएका लक्षणहरु अहिलेसम्म नदेखिएको अस्पतालका चिकित्सकहरुले जनाएका छन् ।
आमा, छोरा र बुहारी तीनैजना चैतको पहिलो साता बेलायतबाट आई अपार्टमेन्टमा बस्दै आएका थिए । अपार्टमेन्ट सोमबार साँझ नै सिल गरेर उनीहरुको सम्पर्कमा रहेकाहरुको पहिचान शुरु गरिसकेको छ । अपार्टमेन्टमा करिब २ हजारको हाराहारीमा मानिसहरु बसोबास गर्दै आएको जनाईएको छ ।