हिँडेर गाउँ जान नदिन प्रधानमन्त्रीको निर्देशन

६ बैशाख, हेटौंडा । कोरोनाका कारण स्वास्थ्य संकट बढीरहेको बेला प्रधानमन्त्री केपी शर्मा ओलीले हिँडेर कसैलाई पनि गाउँ जान नदिन निर्देशन दिएका छन् । 
प्रधानमन्त्री ओलीले सरकारी निवास बालुवाटारमा मन्त्रिपरिषद्का सदस्यहरु, उच्चस्तरीय समन्वय समिति, कोभिड क्राइसीस म्यानेजमेन्ट सेन्टर (सीसीएमसी) का पदाधिकारीसहितको विशेष बैठकमा शुक्रबार यस्तो निर्देशन दिएका हुन् ।
उनले खानको समस्यामा परेकालाई तत्काल खानाको व्यवस्था गर्न पनि निर्देशन दिएका छन् ।
खाना र बस्न समस्या भएको भन्दै मानिसहरु लकडाउनको बेला हिँडेरै आफ्नो गृह जिल्ला जान थालेपछि प्रधानमन्त्रीले मन्त्रीहरुलाई समस्या परेका मानिसलाई खानाको व्यवस्था मिलाउन भनेका हुन् ।
बैठकमा पैदल घर जान हिँडेकालाई जहाँ छन् त्यहीँ खानबस्नको व्यवस्था गर्ने वा जसरी पनि घर जान चाहनेलाई उच्च सुरक्षासहित जिल्ला सदरमुकामसम्म पुर्याउने भन्ने विषयमा छलफल भएको अर्थ र सञ्चार तथा सूचना प्रविधि मन्त्री डा.युवराज खतिवडाले जानकारी दिए ।
उक्त बैठकमा कोभिड–१९ संक्रमण रोकथाम तथा नियन्त्रणका लागि भइरहेका प्रयास, औषधि, स्वास्थ्य सामग्री, उपकरण तथा स्वास्थ्यकर्मीको व्यवस्थापनलगायत विषयमा प्रधानमन्त्रीले जानकारी लिएको मन्त्री खतिवडाले बताए । 
यस्तै लकडाउनको कडाईका साथ पालना गर्न र गराउन पनि प्रधानमन्त्रलिे निर्देशन दिएको मन्त्री खतिवडाको भनाई छ ।
राजधानीमा कोरोना संक्रमण थप पाइएपछि काठमाडौँबाट बाहिर जानका लागि थप कडाई गर्ने निर्णय सरकारले यसअघिनै गरेको थियो ।