अख्तियारको कार्यप्रगति ६७ प्रतिशत

१२ साउन, हेटौँडा । भ्रष्टाचार नियन्त्रणको क्षेत्रमा कार्यरत अख्तियार दुरुपयोग अनुसन्धान आयोग मध्यमाञ्चल क्षेत्रीय कार्यालय हेटौँडाले एक बर्षमा ६७.६९ प्रतिशत कार्यप्रगति गरेको छ । क्षेत्रीय कार्यालय हेटौँडाले बुधबार गरेको पत्रकार सम्मेलनमा आव २०७२/०७३ मा ६७.६९ प्रतिशत कार्यप्रगति गरेको जनाएको हो ।

आयोगको क्षेत्रीय कार्यालयको प्रगति ७४.१४ छ भने बर्दिवास कार्यालयको ५४.८७ रहेको छ । आव २०७२/०७३ मा २ हजार ८३ उजुरीमध्ये १ हजार ४ सय १० उजुरीको फर्छौट गरेको जनाईएको छ । जसमध्ये क्षेत्रीय कार्यालयबाट १ हजार २७ र बर्दिवासबाट ३८३ रहेका छन् । २ हजार ८३ मध्ये आव ०७१/०७२ बाट १ हजार ३ सय २८ मुद्धा जिम्मेवारी सरि आएका र ७ सय ५५ भने आव ०७२/०७३ मा दर्ता भएका कार्यालय प्रमुख डुल्लुराज बस्नेतले बताए । बाँकी ६ सय ७३ उजुरी चालु आव ०७३/०७४ का लागि जिम्मेवारी सरेको जनाईएको छ ।
शिक्षामा बढि उजुरी
अख्तियार दुरुपयोग अनुसन्धान आयोग क्षेत्रीय कार्यालयमा सबैभन्दा बढि उजुरी शिक्षा क्षेत्रको परेको थियो । शिक्षाअन्तरगतका ७ सय ७५ उजुरी परेका थिए भने ४ सय ६१ फर्छौट भएका छन् । त्यसैगरी स्थानीय निकाय अन्तरगत ६ सय १३ उजुरी परेकोमा ३ सय ९४ उजुरी फर्छौट भएका छन् । तेस्रोमा भुमि सुधार तथा व्यवस्था मन्त्रालय अन्तरगत १ सय ४३ उजुरी परेकोमा १ सय १९ फर्छौट भएको अख्तियारको भनाई छ ।