बीरबहादुर र सितारामबाट कार्यक्रम बहिष्कार

१३ साउन, हेटौंडा । स्थानीय तहको पुनर्संरचनाको विषयमा हेटौंडामा भएको जिल्ला स्तरीय परामर्श कार्यशाला गोष्ठी दुई नेताले बहिष्कार गरेका छन् ।

जिविस मकवानपुरको सभाहलमा भएको गोष्ठी पूर्व सांसद बीरबहादुर लामा र राप्रपाका क्षेत्रीय सभापति सिताराम वर्तौलाले कार्यक्रम बहिष्कार गरेका हुन् । दुवैले केन्द्रबाट अाएको र स्थानीयस्तरमा गरिएको विभाजन व्यवहारिक नभएको बताए । उनीहरूले जनतालाई सुविधा पुग्ने दृष्टिकोणले स्थानीय तहको पुनर्संरचना हुनुपर्नेमा राजनीतिक लाभको हिसाबले विभाजन गरेको बताए । उनीहरू अाफ्नो धारणा राखेर बाहिरिएका थिए । 

छलफलमा सुकौरा गाविसलाई भीमफेदी सदरमुकाम बनाएर पुर्नसंरचनाको खाका प्रस्तुत गरेको भन्दै त्यहाँका स्थानीयले पनि विरोध गरेका छन् । उनीहरुले आफुहरुलाई सेवा लिन असुविधा हुने भएकाले आफुहरु यसमा सहमत हुन नसक्ने बताए । त्यसैगरी आमभञ्ज्याङका स्थानीयले पनि भीमफेदीतर्फ राखेकोमा असन्तुष्ट व्यक्त गरेका छन् ।

कार्यक्रममा सांसदहरू सुवासचन्द्र ठकुरी, राजाराम स्याङ्तान, पूर्व सभासद प्रेमबहादुर पुलामी, पूर्व सांसद बिरोध खतिवडा, विभिन्न दलका नेता र सरोकारवालाहरूको सहभागिता रहेको थियोे ।