परीक्षा एउटाको नतिजा अर्कैको !

७ असार,भक्तपुर । मनकामना इंगलिस सेकेन्डरी स्कुलबाट सिम्बल नम्बर ‘०२८४५६४ टी’ भएका सन्देश सांगामीले एसईई परिक्षामा ऐच्छिक गणित विषयको परिक्षा दिए । तर, शुक्रबार प्रकाशित एसईईको परिक्षाफलमा भने उनको ऐच्छिक गणितको स्थानमा अर्थशास्त्र विषयको नतिजा आएको इकान्तिपुरको समाचारमा उल्लेख छ ।

सानै कक्षादेखि मेधावी छात्रको रुपमा रहेका सन्देशको अन्य विषयमा समेत सोचे जस्तो नतिजा आएन । एसईईमा उत्कृष्ट अंक ल्याई विज्ञान विषय पढेर डाक्टर बन्ने उनको सपना अहिले यही परीक्षाफलका कारण अन्यौलमा परेको उनको गुनासो छ । 

‘हाम्रो स्कुलमा अर्थशास्त्र विषय पढाई नै हुँदैन,’ उनले भने, ‘परिक्षा नै नदिएको विषयको नतिजा आयो ।’ एसईईमा ‘ए प्लस’ को अपेक्षा गरेको सन्देशको नतिजा ‘सी प्लस’ आएको मनकामना स्कुलका प्रिन्सिपल श्रीराम आचार्यले बताए । मनकामना स्कुलकै सृष्टि शाक्यको नतिजा पनि उस्तै भएको छ । ऐच्छिक गणित विषयमा परिक्षा दिएकी सृष्टिको परिक्षाफल अर्थशास्त्र विषयको आएको छ ।

‘अप्रत्यासित परिक्षाफल सार्वजनिक भएको छ, परिवारमा सबैलाई तनाव छ,’ उनले गुनासो गरिन्, ‘एसईईको नतिजाले भविष्य बारे सोच्नै सकेकी छैन ।’ राजधानीको राम्रो कलेजमा पढेर इञ्जिनियर बन्ने सपना एसईईको नतिजाले अन्यौलतिर धकेलिएको उनी बताउँछिन् । परिक्षा नियन्त्रक अम्बिकाप्रसाद रेग्मीले गल्ती भएको स्वीकार्दै तत्काल गल्ती सच्याएर विद्यार्थीको नतिजा दिने बताएका छन् ।