इन्स्पेक्टर तिमिल्सिना बने असोज महिनाको उत्कृष्ट प्रहरी

१५ कार्तिक,हेटौँडा।  इलाका प्रहरी कार्यालय बनेपा काभ्रेका प्रहरी निरीक्षक (इन्सपेक्टरं) योगेन्द्र तिमिल्सिना बागमती प्रदेशकै असोज महिनाको उत्कृष्ट प्रहरी घोषित भएका छन् ।उनी बागमती बागमती प्रदेश प्रहरी कार्यालयले गरेको मूल्यांकनको आधारमा प्रदेशकै उत्कृष्ट प्रहरी घोषित भएका हुन।

बागमती प्रदेश प्रहरी कार्यालयले आफ्नो कार्यालय मातहत कार्यरत प्रहरी कर्मचारीको कार्यसम्पादनको आधारमा तिमिल्सिनालाई असोज महिनाको सर्वोत्कृष्ट प्रहरी घोषणा गरिएको बागमती प्रदेश प्रहरी कार्यालय हेटौँडाका प्रहरी प्रवक्ता प्रहरी वरिष्ठ उपरीक्षक सुदिप गिरीले बताएका छन्। 

उनले असोज महिनाको विभिन्न मितिमा अदालतले फैसला गरी फरार रहेका ९ जना फरार प्रतिवादीलाई पक्राउ गरी अदालतमा कैद भुक्तानको लागि पेश गरेको, लागु औषधसहित मानिस पक्राउ गरेको, डलर साट्ने बहानामा ठगी गर्ने समुह पक्राउ गरेकाले उनलाई सर्वोत्कृष्ट घोषणा गरेको  प्रवक्ता एसएसपी गिरीले बताएका छन्। प्रदेश प्रहरी कार्यालयले महिनाको उत्कृष्ट प्रहरी छनौट कार्यविधि २०७७ अनुसार छनोट समिति गठन गरेर हरेक महिना सर्वोत्कृष्ट प्रदेश प्रहरी घोषणा गर्न थालेको छ।यस अघि वडा प्रहरी कार्यालय हेटौँडामा कार्यरत तत्कालीन प्रहरी निरीक्षक ईश्वरी प्रसाद भण्डारी उत्कृष्ट प्रहरीको रुपमा पुरस्कृत भएका थिए।