फेकोफनद्वारा पत्रकार महासंघ सम्मानित

२५ साउन, हेटौँडा । दोस्रो सामुदायिक राष्ट्रिय वन दिवसको अवसरमा सामुदायिक वन उपभोक्ता महासंघ मकवानपुरले विभिन्न व्यक्ति एवं सामुदायिक वनलाई सम्मान गरेको छ । 
२०६३ सालको सर्वमान्य गणेशमानसिंह वन संरक्षण तेस्रो पुरस्कार प्राप्त गर्न सफल न्यूरेनी चिसापानी सामुदायिक वन, नेपाल पत्रकार महासंघ मकवानपुर, लामो समयदेखि सामुदायिक वनको नेतृत्व भूमिका निर्वाह गर्ने नवलपुर सरस्वति सामुदायिक वनका अध्यक्ष माधवप्रसाद सुवेदी, बुंदल सामुदायिक वन समूहका अध्यक्ष चन्द्रप्रसाद दुलाल, लालीगुराँस सिकाई केन्द्र मनहरी र जरुङ शक्ति सामुदायिक वन समूहलाई सम्मान गरिएको थियो । 
जिल्ला वन अधिकृत राजेन्द्र न्यौपानेको प्रमुख आतिथ्यता एवं महासंघ मकवानपुरकी अध्यक्ष पञ्चमाया स्यांतानको अध्यक्षतामा कार्यक्रम भएको थियो । कार्यक्रममा जिल्ला समन्वय समिति मकवानपुरका सामुदायिक विकास अधिकृत रामकृष्ण थापा, महासंघकी उपाध्यक्ष गोपिमाया अधिकारी, सचिवालय सदस्य देवीप्रसाद दाहाल, रामहरी चौलागाई लगायतले मन्तव्य व्यक्त गरेका थिए । नेपाल सरकारले अघिल्लो बर्षदेखि प्रत्येक बर्षको साउन २५ गतेलाई राष्ट्रिय सामुदायिक वन दिवसको  रुपमा मनाउन शुरु गरेको छ ।