सालक संरक्षणबारे अन्तरक्रिया

१६ भदौं, हेटौँडा । सालकको बासस्थानको सुरक्षा, यसको संरक्षण र विस्तार बारे शुक्रबार चुच्चेखोलामा वृहत अन्तरक्रिया कार्यक्रमको आयोजना गरिएको छ । 
जिल्ला वन कार्यालय मकवानपुर, जुरोजिकल सोसाईटी अफ लण्डन र चुच्चेखोला सामुदायिक वन उपभोक्ता समूहको संयुक्त आयोजनामा अन्तरक्रिया कार्यक्रमको आयोजना गरिएको हो । अन्तरक्रिया कार्यक्रमका सहभागीहरुले सालकको संरक्षण, बासस्थान र यसको विस्तार, चोरी शिकार नियन्त्रण, कानूनी प्रावधान लगायतका विषयहरुमा छलफल गरेका थिए । कार्यक्रममा जुरोजिकल सोसाईटी अफ लण्डनका कार्यक्रम संयोजक भगवान दाहालले सालकको संरक्षण गर्न सबै उपभोक्ताहरुलाई आग्रह गर्दै कार्यक्रममा सहयोग गर्ने बताए ।
जिल्ला वन अधिकृत राजेन्द्र न्यौपानेको प्रमुख आतिथ्यता एवम समूहका अध्यक्ष अर्जुनप्रसाद दाहालको अध्यक्षतामा कार्यक्रम भएको थियो । कार्यक्रममा हेटौडा–१७ का वडाध्यक्ष भैरबबहादुर राई, पूर्वअध्यक्ष चेतनाथ चौलागाई, सञ्चारकर्मी भीमसेन पौडेल, कमलको फूल आयआर्जन समूहकी अध्यक्ष विभामाया दुरच्याई मगर, प्रगतिशिल यूवा क्लवका अध्यक्ष अमित कडेल, उपभोक्ता मुक्तीनाथ गौतम, कार्यालय सचिव केदारप्रसाद गौतम लगायतकाले मन्तव्य व्यक्त गरेका थिए । 
समूहलाई सालक संरक्षण,चोरीशिकारी नियन्त्रण र आयमुलक कार्यक्रम संचालन गर्न जुरोजिकल सोसाईटी अफ लण्डनले आर्थिक सहयोग गर्ने भएको छ ।