राष्ट्रियसभा सदस्य निर्वाचनको तयारी पुरा,मुख्यमन्त्री पाण्डेको अवलोकन

सुनिल शिवाकोटी

११ माघ,हेटौंडा। राष्ट्रिय सभा सदस्य निर्वाचन अन्तर्गत बागमती प्रदेशमा हुने निर्वाचनको तयारी पुरा भएको छ।  

बागमती प्रदेशतर्फ खाली रहेको दुइ सिटका लागि बुधबार हुने निर्वाचन प्रक्रिया अन्तर्गत हुने मतदानको तयारी पूरा भएको निर्वाचन आयोग प्रदेश निर्वाचन कार्यालय बागमती प्रदेश हेटौंडाका प्रमुख लुमनाथ पोखरेलले जनाएका छन्। 

हेटौंडा-८ मा रहेको औद्योगिक व्यवस्थापन लिमिटेडको सभागृहमा हुने मतदान प्रकृयामा प्रदेशसभा सदस्यका लागि र जनप्रतिनिधिका लागि छुट्टै(दुईवटा) मतदान केन्द्र कायम गरिएको मतदान केन्द्रमा अधिकृतसहित ८–८ जना गरी १६ जना कर्मचारी खटाइने पोखरेलले जानकारी दिएका छन्।पोखरेलका अनुसार मतदान केन्द्र अनुसार मतपत्रको रङ पनि फरक/फरक रहने छ। 

मतदान स्थलमा हेल्प डेस्क, स्वास्थ्य क्लिनिक सञ्चालन तथा कोरोना जाँच(एन्टिजेन जाँच)को व्यवस्था गरिएको छ। कोभिड–१९ महामारीको कारणले गर्दा स्वास्थ्य सुरक्षामा केही चुनौती देखिएकोले मतदान स्थल प्रवेशका लागि कोरोना खोप कार्ड अनिवार्य देखाउने पर्ने व्यवस्था गरिएको छ भने खोप नलगाएकालाई खोप लगाउने र एन्टिजेनको व्यवस्था  समेत गरिएको मुख्य निर्वाचन अधिकृत डिल्लीरत्न श्रेष्ठले बताएका छन्।  

"मतदाता मध्ये कोही कोरोना संक्रमित भए वा लक्षण देखिएको पाइएमा छुट्टै मतदान गर्ने गरी व्यवस्थापन गरिएको छ भने मतदान स्थलमा जिल्ला स्वास्थ्य कार्यालय मकवानपुरले हेल्पडेक्स सहित २ जना स्वास्थ्यकर्मी रहनेछन"- मुख्य निर्वाचन अधिकृत श्रेष्ठले भने।

विहान ९ बजेबाट सुरु मतदान  दिउँसो ३ बजे समाप्त हुने,मतदान सकिए लगत्तै मतगणना सुरु गरिने र नतिजा साझँ सम्म सार्वजनिक गरिने मुख्य निर्वाचन अधिकृत श्रेष्ठले बताए।त्यसैगरी मतदान स्थलको बागमती प्रदेशका मुख्यमन्त्री राजेन्द्रप्रसाद पाण्डेले अवलोकन गरेका छन्। मंगलबार दिउँसो मतदान प्रकृया र मतदान स्थलको व्यवस्थापन बुझ्न मुख्यमन्त्री पाण्डे मतदान स्थल औद्योगिक व्यवस्थापन लिमिटेडको सभागृह पुगेका थिए।  

अवलोकनका क्रममा मुख्य निर्वाचन अधिकृत डिल्लीरत्न श्रेष्ठ र निर्वाचन आयोग प्रदेश निर्वाचन कार्यालय बागमती प्रदेशका प्रमुख लुमनाथ पोखरेलले मतदान प्रकृया,मतदान केन्द्रको बारेमा अवगत गराएका थिए भने मकवानपुरका प्रमुख जिल्ला अधिकारी भरतमणी पाण्डेले मतदान स्थलको सुरक्षा अवस्थाको बारेमा जानकारी गराएका थिए।  

भोली(बुधबार) हुने राष्ट्रियसभा सदस्य पदका लागि ६ जनाको उम्मेदवारी परेको छ ।सत्तारुढ गठबन्धनका दुई जना,नेकपा एमालेको तर्फबाट २ जना र नेपाल मजदुर किसान पार्टीबाट दुईजना गरी ६ जनाले  मनोनयन दर्ता गरेका छन् । गठबन्धन दलका तर्फबाट महिलामा नेकपा (एस) बाट गोमादेवी तिमल्सिना र अन्यमा कांग्रेसबाट कृष्णप्रसाद पौडेल रहेका छन।विपक्षी दल नेकपा एमालेबाट महिलामा निरुकुमारी कुँवर तथा अन्यमा गोपाल शाक्य र नेमकिपाबाट महिलामा गीता काफ्ले र अन्यमा कृष्णबहादुर तामाङ उम्मेदवार रहेका छन्। 

उक्त निर्वाचनमा बागमती प्रदेशसभाका १ सय ९ जना सदस्यहरु र प्रदेशका १३ जिल्लाका १ सय १९ वटा स्थानीय तहका २ सय ३७ प्रमुख/उपप्रमुख गरी कुल ३ सय ४८ जनाले मतदान गर्नेछन्।