बागमती प्रदेश राष्ट्रियसभा सदस्य निर्वाचन: ३१० जनाले गरे मतदान

कांग्रेस संसदीय दलका नेता ईन्द्रबहादुर बानियाँ मतदान गर्दै

१२ माघ,हेटौंडा। हेटौंडा-८ मा रहेको औद्योगिक व्यवस्थापन लिमिटेडको सभागृहमा यति बेला राष्ट्रियसभा सदस्यको निर्वाचन अन्तर्गत मतदान जारी रहेको छ। यो समाचार तयार पार्दासम्म ९७ जना प्रदेश सदस्य तथा २१३  जनप्रतिनिधिले गरी हालसम्म ३१० जनाले मतदान गरिसकेको मुख्य निर्वाचन अधिकृत डिल्लीरत्न श्रेष्ठले बताएका छन। 

पानी परेर तोकिएको समयभन्दा ढिलागरी सुरु भएको मतदान कडा सुरक्षाबीच जारी रहेको छ। मतदानको समय तिन बजेसम्मलाई तोकिएको छ।आजै साँझ ७ बजेसम्ममा मतपरिणाम सार्वजनिक गरिने बुझिएको छ। 

निर्वाचनमा बागमती प्रदेशसभाका १ सय ९ जना सदस्यहरु र प्रदेशका १३ जिल्लाका १ सय १९ वटा स्थानीय तहका २ सय ३७ प्रमुख/उपप्रमुख गरी कुल ३ सय ४६ जनाले मतदान गर्नेछन।आज हुने बागमती प्रदेश राष्ट्रियसभा सदस्य महिला र अन्य गरी २ पदका लागि ६ जनाको उम्मेदवारी परेको छ ।सत्तारुढ गठबन्धनका दुई जना,नेकपा एमालेको तर्फबाट २ जना र नेपाल मजदुर किसान पार्टीबाट दुईजना गरी ६ जनाले  मनोनयन दर्ता गरेका छन् । गठबन्धन दलका तर्फबाट महिलामा नेकपा (एस) बाट गोमादेवी तिमल्सिना र अन्यमा कांग्रेसबाट कृष्णप्रसाद पौडेल रहेका छन।विपक्षी दल नेकपा एमालेबाट महिलामा निरुकुमारी कुँवर तथा अन्यमा गोपाल शाक्य र नेमकिपाबाट महिलामा गीता काफ्ले र अन्यमा कृष्णबहादुर तामाङ उम्मेदवार रहेका छन।