त्रिपालले छोपेर राखिएको रेल आइतबारबाट संचालनमा आयो

file photo

१ फागुन, जनकपुर । नेपाल सरकारले दुई वटा रेल खरिद गरेको करिब १५ महिनापछि जनकपुर–जयनगर रेल सेवा आइतबारदेखि संचालनमा आएको छ ।
रेल सेवाको औपचारिक उद्घाटन नभएसम्म प्रत्येक दिन एक पटक ‘ड्राई रन’ सञ्चालन भइरहने तर यात्रुले भने रेलमा तत्काल यात्रु चढ्न पाउने छैनन ।
ड्राई रनको लागि रेल धनुषाको इनर्वाबाट जनकपुरधाम स्टेशन आइपु्गेपछि स्थानीयले स्वागत गरेका थिए ।
नियमित सेवा सञ्चालनको पूर्वाभ्यासको लागि ड्राई रन सुरु गरिएको नेपाल रेल–वे कम्पनीका इन्जिनियर रविन्द्र साहले बताएका छन् । नेपाल रेल–वे कम्पनीका महाप्रबन्धक निरञ्जन झाले विगत १७ महिनादेखि थन्काएर राखिएका रेलको सम्पूर्ण प्राविधिक चेक जाँचको लागि ड्राई रन सुरु गरिएको जानकारी दिए ।
कुर्था–जयनगरसम्म ३४.९ किलोमिटरसम्म चल्ने रेल मार्गको व्यवस्थापनका लागि जनप्रतिनिधिसँग छलफल आवश्यक भएको महाप्रबन्धक झाको भनाइ छ । २०७७ असोज २ गते भारतीय कम्पनी कर्पाेरेशनबाट ८४ करोड ६५ लाखमा खरिद गरिएको दुई सेट डेमो रेलमा दुई वटा इन्जिनसहित १० वटा बोगी रहेका छन् । दुबै बोगी गरी १३ सय ५० यात्रु बोक्ने क्षमता रहेको छ ।
प्रधानमन्त्री शेरबहादुर देउवा र भारतका प्रधानमन्त्री नरेन्द्र मोदीले संयुक्तरूपमा भर्चुअल माध्यमबाट फागुनको दोस्रो साता रेल सेवाको उद्घाटन गर्ने तयारी भइरहेको महाप्रबन्धक झाले जानकारी दिए ।