थाहा नगरमा गठबन्धनका उम्मेदवार प्रतिवद्धतासहित प्रचारप्रसारमा

२० बैशाख, हेटौंडा । मकवानपुरको उत्तरी क्षेत्रस्थित थाहा नगरपालिकामा स्थानीय तह निर्वाचनका लागि गठबन्धनका उम्मेदवार प्रतिवद्धतासहित प्रचारप्रसारलाई जुटेका छन् ।

थाहामा माओवादी केन्द्रबाट मेयरमा विष्णु बिष्ट र कांग्रेसबाट उपमेयरका उम्मेदवार भरत गोपाली नेतृत्वमा १२ वटै वडामा प्रचारप्रसारलाई तीब्रता दिइएको हो ।

१२ नम्बर वडा बाहेकका वडामा गठबन्धन नभएपछि मेयर, उपमेयरका लागि दलीय गठबन्धनले मत मागिरहेको उपमेयरका उम्मेदवार गोपाली बताए ।

थाहामा यसअघि २०७४ मा पनि माओवादी केन्द्र र कांग्रेसबीच गठबन्धन भएको थियो । माओवादीबाट मेयरमा लवशेर विष्ट र उपमेयरमा कांग्रेसबाट खड्ग गोपाली निर्वाचित भएका थिए । संयुक्त पाँच दलीय गठबन्धनमा पनि यसपटक माओवादी केन्द्र र कांग्रेसको भागमा पर्ने गरी थाहा नगरमा तालमेल गर्दा जितका लागि सहज भएको मेयरका उम्मेदवार बिष्टले बताए । उनले घरदैलो, जनतामा गठबन्धनको प्रतिबद्धता पुर्याउने र जनताका समस्यालाई मुख्य एजेन्डा बनाएर प्रचारप्रसारमा जुटेको जानकारी दिए ।

पर्यटकीय नगरीको रुपमा देशभर परिचित थाहामा पर्यटकीय विकाससँगै अधिकांश जनताका कृषिसँग जोडिएकोले आधुनिक कृषिमा जोड दिने उपप्रमुखका उम्मेदवार विष्टले प्रतिबद्धता व्यक्त गरे । उनले प्रचारप्रसारको क्रममा गठबन्धनका सबै उम्मेदवारले जनताको समस्यालाई समेट्ने विश्वास दिलाइरहेको बताए । १० स्थानीय तहमध्ये उत्कृष्ट मानिएको थाहा नगरमा हाल करिब ३२ हजार मतदाता छन् ।