राजकीय सम्मानका साथ कांग्रेस नेता गिरिको अन्त्येष्टि

५ भदौं, हेटौंडा । नेपाली कांग्रेस नेता तथा प्रतिनिधिसभा सदस्य प्रदीप गिरिको राजकीय सम्मानका साथ अन्तिम सस्कार गरिएको छ । पशुपति आर्यघाटमा उनको राजकीय सम्मानका साथ अन्त्येष्टि गरिएको हो । 
उनीप्रति अन्तिम श्रद्धाञ्जली अर्पण गर्न कांग्रेस शिर्ष नेता, कार्यकर्ता अन्य राजनितिक दलका नेता कार्यकर्ता तथा शुभचिन्तक पशुपति आर्यघाट पुगेका थिए । अन्त्येष्टिअघि काँग्रेस केन्द्रीय कार्यालय सानेपाबाट शवयात्रा गर्दै गिरिको शवलाई पशुपति आर्यघाटमा लगिएको थियो । 
पशुपति आर्यघाटमा गिरिको शवमा उहाँका छोरा सन्तोष सिलवाल गिरिले दागबत्ती दिएका थिए । प्रधानमन्त्री तथा कांग्रेस सभापति शेरबहादुर देउवा, नेकपा एमालेका अध्यक्ष केपी शर्मा ओली लगायतका उच्च पदस्थ व्यक्तिहरूले गिरिप्रति श्रद्धाञ्जली अर्पण गरेका थिए । गिरिका शुभचिन्तक तथा समर्थकको पनि ठूलो संख्यामा उपस्थिति थियो ।
यसअघि विभिन्न दलका नेता कार्यकर्ता कांग्रेसको पार्टी कार्यालय सानेपामा पुगेर काँग्रेसका नेता गिरिको पार्थिव शरीरमा श्रद्धाञ्जली व्यक्त गरेका थिए । कांग्रेस सभापति एवं प्रधानमन्त्री शेरबहादुर देउवा, उपसभापति पूर्णबहादुर खड्का, महामन्त्री गगनकुमार थापा, नेता रामचन्द्र पौडेल लगायत नेताले उहाँको पार्थिव शरीरमा माल्यार्पण गर्नुका साथै पार्टीको झन्डा ओडाएका थिए । 
अध्ययनशील तथा प्रखर समाजवादी चिन्तक गिरिको ललितपुर भैंसेपाटीस्थित मेडिसिटी अस्पतालमा घाँटीको क्यान्सरको उपचारका क्रममा हिजो राति ९ः३० बजे निधन भएको हो ।