मकवानपुर स्थित पुर्व पश्चिम राजमार्गमा टाइम कार्ड

१४ असोज,हेटौंडा । जिल्ला प्रहरी कार्यालय र ट्राफिक प्रहरी कार्यालयले संयुक्त रुपमा मकवानपुर स्थित पुर्वपश्चिम राजमार्गमा टाईम कार्ड प्रणाली लागु गरेको छ ।

चाडपर्व लक्षित बिशेष सुरक्षा योजना अन्तर्गत सडकखण्डमा हुने सडक दुर्घटना न्युनीकरण गर्न जिल्ला प्रहरी कार्यालय मकवानपुर र जिल्ला ट्राफिक प्रहरी कार्यालय मकवानपुरको संयुक्त  टाईम कार्ड लागु गरेको हो। 
शुक्रबार हेटौंडा-१५ पिपल चौतारोबाट ईलाका प्रहरी कार्यालय पशुपतिनगरका प्रहरी निरीक्षक सुमन बानियाँ सहितको प्रहरी टोलीले सवारी चालकहरुलाई टाइम कार्ड प्रदान गरी सेवाको सुरुवात गरेको हो ।
जिल्लाको हेटौंडा उपमहानगरपालिका वडा नम्बर १५ चुरियामाई पिपलचौतारा देखि मनहरी गाउँपालिका वडा ७ सम्म करिब ५० किलोमिटर सडक यात्रा  अबधिका लागि टाइम कार्ड लागु हुने मकवानपुरका प्रहरी प्रमुख एसपी बामदेव गौतमले बताएका छन्।राजमार्गमा रुटमा चल्ने यात्रुबाहक बसहरुलाई रोकेर चेकजाँच गर्नुको साथै तिब्र गतिमा सवारी चलाउँदा हुन सक्ने संभावित दुर्घटनालाई मध्यनजर गरेर 
दुर्घटना नहोस भन्न र  सुरक्षित यात्राको लागि टाईम कार्ड लागु गरिएको जिल्ला प्रहरी कार्यालय मकवानपुरले जनाएको छ । टाइम कार्ड यात्रु बाहक सवारीमा लागु हुनेछ।यता मकवानपुर प्रहरीले उक्त दुरीमा मकवानपुर भित्रिने र बाहिरिने रात्री बसमा हतियार सहितको प्रहरी गस्ती सुरु गरिसकेको छ।