पुष्पाञ्जली आमा समुहलाई वडा कार्यलयको सहयोग

१५ असोज, हेटौंडा । समाजमा हुने विकृती एवम् विसंगती अन्त्यका लागि रात्रीकालीन गस्ती गर्ने हेटौंडा–९ को पुष्पाञ्जली आमा समूहलाई ९ नम्बर वडा कार्यालयले विभिन्न सामग्री सहयोग गरेको छ । 
गस्तीमा हिंड्ने महिला टोलीलाई सहयोग पु¥याउने उद्देश्यले हेटौंडा उपमहानगरपालिका–९ नम्बर वडा कार्यालयले राती हिंड्न सहज हुने ज्याकेट, जुत्ता, टर्च, सिट्ठी तथा सामान्य उपचारका लागि स्वास्थ्य सामग्री सहितको बक्स हस्तान्तरण गरेको हो । 
वडा कार्यालयले महिला समूहका लागि खरिद गरेको सामग्री हेटौंडा उपमहानगरपालिकाका मेयर मीनाकुमारी लामाले महिला समुहका अध्यक्ष कल्पना थापा मगर सहित समूहमा आवद्ध रहेका ४० जनालाई हस्तान्तरण गरेकी हुन् । 
महिला समूहले प्रत्येक रात वडा क्षेत्रमा गस्ती गर्ने गरेका छन् । महिला समूहलाई सामग्री हस्तान्तरण गर्दै मेयर लामाले समाज सुधारको लागि महिला समूहले देखाएको तत्पर्ताको प्रशंसा गरिन् । उनले उपमहानगरका सबै वडाहरुमा यस्तो अभियान चलाउन जरुरी रहेकोमा  जोड दिइन् । लामो समय देखि नियमित र निरन्तर गरेको अभियानले समाज सुधारमा महत्वपूर्ण काम भएको बताइन् । 
कार्यक्रममा वडा नम्बर ९ का अध्यक्ष शुकराम केसीले आमा समूहको कामले वडामा रात्रीकालीन यात्रामा सहज भएको बताए । उनले वडामा रहेको बेतिथीलाई आमा समूहको गस्ती अभियानले रोकेको दावी गरे । सामग्री हस्तान्तरण कार्यक्रममा जिल्ला समन्वय समितिका सदस्य बीरेन्द्र लामा, सुनिता दर्नाल, वडा सदस्य कमला पौडेल, नगर स्वास्थ्य समितिका सदस्य बेगम बराल लगायतको उपस्थिती थियो ।