माओवादीबाट मकवानपुरमा कुमारी र छिन्तुलाई टिकट

२२ असोज, हेटौंडा । आगामी मंसिर ४ गते हुने प्रतिनिधि सभा र प्रदेश सभा निर्वाचनका लागी मकवानपुरमा दुईवटा प्रदेश सभा सिट पाएको नेकपा माओवादी केन्द्रले उम्मेदवार टुंगो लगाएको छ । 
माओवादी केन्द्रले मकवानपुर क्षेत्र नम्बर १ को (क) बाट प्रेमबहाुर पुलामी (छिन्तु) र २ को (क) बाट कुमारी मुक्तानलाई उम्मेदवार बनाउँने निर्णय भएको माओवादी केन्द्रका बागमती प्रदेश उपाध्यक्ष प्रेमबहादुर पुलामी (छिन्ुत)ले जानकारी दिए ।
 गठबन्धनमा सिट बाँडफाड गर्दा माओवादीले मकवानपुरमा प्रदेश सभाका दुईवटा सिट मात्रै पाएको छ । यसअघि पनि छिन्तु र मुक्तान साविक क्षेत्रबाटै प्रदेश सभा सदस्यमा निर्वाचित भएका थिए । छिन्तु बागमती प्रदेश उपाध्यक्ष छन भने मोक्तान बागमती प्रदेश सरकारको समाजिक विकास मन्त्री रहेकी छन् । 
यता गठबन्धन भित्र रहेको दल नेपाली कांग्रेसले भने अझैसम्म आफ्नो भागमा परेको क्षेत्रको उम्मेदवारको नाम सार्वजनिक गरेको छैन । नेपाली कांग्रेसले प्रतिनिधिसभातर्फ मकवानपुर १ र प्रदेशसभातर्फ मकवानपुर १ (ख) र २ (ख)मा उम्मेद्वारी दिने गठबन्धन दलभित्र सहमति बनिसकेको छ । 
प्रतिनिधि सभाका लागि मकवानपुर १ बाट नेपाली कांग्रेसकी सहमहामन्त्री महालक्ष्मी उपाध्याय डिना र मकवानपुर २ (ख) बाट नेपाली कांग्रेस बागमती प्रदेशका सभापति इन्द्रबहादुर बानियाले टिकट पाउने निश्चित जस्तै छ । मकवानपुर १ (ख) मा भने बुद्ध लामा र आनन्दराम पराजुलीको नाम चर्चामा रहेपनि कस्ले टिकट पाउँने भन्नेमा अझै पनि अन्यौल देखिएको छ ।
मकवानपुरमा भिरबाट लडेर एकजनाको मृत्यु
मकवानपुरको राक्सिराङ गाउँपालिका–२ कान्द्राङमा भिरबाट लडेर एकजनाको मृत्यु भएको छ। प्रहरी चौकी कान्द्राङले दिएको जानकारीअनुसार मनहरी गाउँपालिका– ६ घर भएका अन्दाजी ४० वर्षका मनोज राईको मृत्यु भएको हो । राक्सिराङ– ९ धुरुस्थित ससुराली बस्दै आएका राई शुक्रबार साँझ घरबाट निस्केकोमा शनिबार बिहान मृत अवस्थामा फेला परेका हुन्। मादक पदार्थ सेवन गरी घरबाट निस्किएका उनी ससुराली घरबाट दक्षिणतर्फ दुई किलोमिटर पर धुरु भिरबाट लडी मृत अवस्थामा फेला परेका अनुमान गरिएको छ । घटनाबारे अनुसन्धान थालिएको प्रहरीले जनाएको छ ।