मकवानपुरमा उम्मेदावारी दर्ताका लागी दलहरुलाई समय निर्धारण

२२ असोज, हेटौंडा । आगामी मंसिर ४ गते हुने प्रतिनिधि सभा तथा प्रदेश सभा सदस्य निर्वाचनको उम्मेदवारी दर्ताको लागी निर्वाचन अधिकृतको कार्यलय बागमती प्रदेश, हेटौंडाले दलहरुका लागी समय निर्धाण गरेको छ ।
उम्मेदवारी दर्ता गर्ने अघिल्लो दिन शनिवार आज निर्वाचन अधिकृतको कार्यलयमा भएको सर्वदलिय बैठकले समय निर्धारण गरेको प्रतिनिधि सभा क्षेत्र नम्बर १ का सहायक निर्वाचन अधिकृत तिर्थराज भट्टराईले जानकारी दिए ।
निर्वाचन आयोगको कार्यतालिका अनुसार भोली आइतबार विहान १० बजेदेखि साँझ ५ बजेसम्म उम्मेदवारी दर्ता गर्ने समय भएपनि सहजताका लागी प्रमुख दलहरुले मागे अनुसारको समय उपलब्ध गराइएको अधिकृत भट्टराईले बताए । 
दलहरुको सहमती अनुसार नै सत्तारुढ गठबन्धनको प्रमुख घटक नेपाली कांग्रेसका लागी उम्मेदावरी दर्ताको समय साँढे तीन बजे निर्धारण गरिएको छ भने गठबन्धनकै अर्का दुई घटक माओवादी केन्द्र र एकीकृत समाजवादीले अपरान्ह ४ बजेको समय माग गरेका छन् ।
यस्तै प्रमुख प्रतिपक्षी दल नेकपा एमालेका लागी उम्मेदावारी दर्ताको समय २ बजे तोकिएको अधिकृत भट्टराईले जानकारी दिए । राप्रपा नेपाल र राप्रपाले भने दिउँसो १ बजेको समयमा उम्मेदावारी दर्ता गर्ने समय तोकिएको छ भने नेकपा मालेका लागी ३ बजे उम्मेदावारी दर्ता गर्ने समय निर्धारण गरिएको अधिकृत भट्टराईको भनाई छ । 
उम्मेदवारी दर्ता प्रकृयालाई सहज र व्यवस्थापन गर्न समय तालिका निर्धारण गरिएको भएपनि उम्मेदवारहरुले तोकिएको समय भित्र जुनसुकै बेला निर्वाचन अधिकृतको कार्यलयमा उपस्थिति भएर मापदण्ड पुरा गरि उम्मेदावारी दर्ता गर्न सकिने अधिकृत भट्टराईले बताए ।