गठबन्धनप्रति इमानदारिता र सद्भाव देखाऔंः डिना

२७ असोज, हेटौंडा । नेपाली कांग्रेस केन्द्रीय सहमहामन्त्री एवम् आसन्न निर्वाचनमा मकवानपुरको क्षेत्र नम्बर १ बाट प्रतिनिधिसभा सदस्य पदको उम्मेदवार महालक्ष्मी उपाध्याय डिनाले सत्तारुढ गठबन्धनको बीचमा इमानदारिता र सद्भाव आवश्यक रहेको बताएकी छिन् । 
गठबन्धन हुँदा सबै दलको सबै स्थानमा उम्मेदवार नभएको उल्लेख गर्दै उनले संविधान, संसद् र व्यवस्था जोगाउने दलहरुको बीचमा गठबन्धन भएकोले सबैले इमानदारिता देखाउनुपर्ने बताएकी हुन् । 
नेपाली कांग्रेस मकवानपुर क्षेत्र नम्बर १ ले बुधबार हेटौंडामा आयोजना गरेको अगुवा कार्यकर्ता भेलालाई सम्बोधन गर्दै उनले कांग्रेस अल्पमतमा परेकै कारण लोकतान्त्रिक व्यवस्था माथि कुठाराघातको प्रयास भएको दावी गरिन् । 
चुनावपछि गठबन्धनकै सरकार बन्ने तथा गठबन्धन थप मजबुत र सुदृढ भएर अघि बढ्ने जानकारी दिइन् । मकवानपुरको सर्वाङ्गीण विकास र समृद्धिका लागि आफ्नो उम्मेदवारी भएको उनको भनाई थियो ।
यस्तै क्षेत्र नम्बर १ को प्रदेशसभा ‘ख’ का उम्मेदवार आनन्दराम पराजुलीले देशैभर सत्तारुढ गठबन्धनको पक्षमा माहौल बनेको भन्दै गठबन्धनको जितले मात्रै मुुलुकको हित हुने दावी गरे । 
नेपाली कांग्रेस मकवानपुर क्षेत्र नम्बर १ का संघीय सभापति दामोदर खनालको अध्यक्षतामा भएको कार्यक्रममा कांग्रेसका पूर्व जिल्ला सभापति रघुरमण न्यौपाने, जिल्ला सहसचिव ईन्दिरा न्यौपाने, हेटौंडा उपमहानगरपालिकाका उपमेयर राजेश बानियाँ, निवर्तमान जिल्ला प्रवक्ता प्रदीप कोइराला, बागमती गाउँपालिका सभापति फणिन्द्र तिमल्सिना लगायतले गठबन्धनको पक्षमा मतदान गर्न जनता तयार रहेको बताएका थिए ।