रुखलाई हँसिया र कलमलाई हथौडा सम्झेर मतदान गर्नुसः नेता पुलामी

३१ असोज, हेटौंडा । एकीकृत नेपाल कम्युनिष्ट पार्टी माओबादी केन्द्र बागमती प्रदेशका उपाध्यक्ष एवं गठबन्धनका तर्फबाट मकवानपुर प्रदेश सभा क्षेत्र नम्बर १ को (क) का उम्मेदवार प्रेम बहादुर पुलामी (छिन्तु)ले नेकपा एमाले र राजावादी शक्तिहरुको बदमासीविरुद्ध गठबन्धन उभिएको र मकवानपुरको समग्र विकासका लागि मत दिन आग्रह गरेका छन् ।
मकवानपुर गढीको शिखरकटेरीमा गठबन्धन दलको संयुक्त सम्पर्क कार्यालय उद्घाटन गर्दै उनले अनेक आश्वासन दिने, भ्रम फैलाउनेबाहेक एमालेको खास काम नदेखिएको बताउँदै संविधान र व्यवस्था विरोधि कमल थापालाई बोकेर एमाले राष्ट्रियताको दुहाई दिदैँ हिडेको बताए । उनले मकवानपुरका माओबादी कार्यकर्ताहरुलाई गठबन्धनमा मतदान गर्न आग्रह गरे । 
उम्मेदवार छिन्तुले आफ्नो दलका उम्मेदवार नभएपनि गठबन्धनको उम्मेदवार साझा उम्मेदवार भएकोले रुखमा मतदान गर्दा हँसिया र कलममा मतदान गर्दा हथौडा सम्झेर मतदान गर्न कार्यकर्तालाई सुझाव दिए ।
बर्तमान आबश्यक्ताले गठबन्धन गरिएको औंल्याउदै उनले गठबन्धनका साझा उम्मेदवारलाई जिताउनको लागि र साझा उम्मेदवारलाई आ—आफ्नो दलका उम्मेदवार सम्झनको लागि समेत सबैमा आग्रह गरे । 
आफ्नो ५ बर्षिय सांसद कार्यकालमा संसद विकास कोषको रकमले आफ्नो क्षेत्रमा खास विकास भएको र बाँकी रहेको कार्यभार यसपटक पुरा हुने उनको भनाई थियो ।