लोकतान्त्रिक बाम गठबन्धनले हारे लोकतन्त्र संकटमाः डीना 

१ कार्तिक, हेटौंडा ।  कांग्रेस केन्द्रीय सहमहामन्त्री एवम् सत्तारुढ गठबन्धनको तर्फबाट मकवानपुर क्षेत्र नम्बर १ को प्रतिनिधिसभा सदस्य पदका उम्मेदवार महालक्ष्मी उपाध्याय डिनाले सत्तारुढ गठबन्धनले हारेमा मलुक र लोकतन्त्र संकटमा पर्ने बताएकी छिन् । 
नेपाली कांग्रेस बकैया गाउँपालिकाको आयोजनामा बुधबार बकैयामा भएको कार्यकर्ता भेला तथा प्रशिक्षण कार्यक्रममा उनले पटक पटक संसद् विघटन गर्ने, संविधान र लोकतन्त्रमाथि प्रहार गर्ने तत्वबाट मुलुकलाई ५ दलीय गठबन्धनले नै जोगाएको स्मरण गर्दै फेरि पनि त्यस्ता तत्वले जितेमा मुलुकको विकास हुन नसक्ने धारणा राखेकी हुन् । 
‘५ दलको बीचमा अहिले आएर गठबन्धन भएको होइन, यही ५ दलले संसद्, संविधान लोकतन्त्र र मुलुक जोगाएर यहाँसम्म ल्याएको हो । संविधान अनुसारै अहिले निर्वाचन हुन लागेको छ’, डिनाले भनिन्, ‘संविधानमा हस्ताक्षर नगर्ने र संविधान मास्न खोज्नेहरु एक भएर निर्वाचनमा होमिएका छन् त्यस्ता तत्वलाई परास्त गर्न नसके मुलुक फेरि संकटतर्फ जानेछ ।’ 
मंसिर ४ गतेसम्मलाई गठबन्धनका उम्मेदवारलाई जिताउन आफूसंग भएका सम्पूर्ण संयन्त्र प्रयोग गर्न उनले नेता कार्यकर्तालाई अनुरोध समेत गरिन् । ‘मकवानपुरमा रहेर यहाँको विकास र सेवामा निरन्तर लाग्नदै आएको छ । ५ बर्ष अझ जोशका साथ तपाईंहरुकै सेवामा लाग्नेछु’, उनले भनिन्, ‘म सहकारीको माध्यमबाट पनि जिल्लाको आर्थिक विकास र बेरोजगारी समस्या हल गर्ने तथा महिलाहरुको हकहितमा लाग्दै आएको छु ।’ 
आफू कांग्रेस र रुखको प्रतिनिधिको रुपमा निर्वाचनमा होमिएको बताउँदै उनले अहिले गठबन्धनको समेत साझा उम्मेदवार भएकोले जिताउने अभियानमा लाग्न उनले अनुरोध गरिन् । विरोधीहरुले गठबन्धनको बारेमा भ्रम फैलाइरहेको भन्दै उनले निर्वाचन पछि गठबन्धन थप बलियो र एकढिक्का भएर जाने उनको दावी थियो ।
कार्यक्रममा १ को (क) का प्रदेशसभा सदस्य पदका उम्मेदवार प्रेमबहादुर पुलामी छिन्तुले गठबन्धनका उम्मेदवारलाई मतदान गर्न अनुरोध गर्दै व्यवस्था विरोधी तत्वलाई मतदान गरे मुलुक नै बर्बादीको दिशातर्फ जाने बताए । कार्यक्रममा कांग्रेस संघीय सभापति दामोदर खनाल, क्षेत्रीय सभापति सुशान्त श्रेष्ठ, माओवादी नेता लोकनाथ गौतम लगायतले गठबन्धनका उम्मेदवारको जित सुनिश्चित रहेको दावी गर्दै एकताबद्ध भएर गठबन्धनको पक्षमा लाग्न सबैसँग आग्रह गरे ।