व्यवस्था विरोधी बोक्नेहरु राष्ट्रवादी ?:  छिन्तु

३ कार्तिक, हेटौंडा । गठबन्धनको तर्फबाट मकवानपुरको क्षेत्र नम्बर १ को प्रदेशसभा (क) का उम्मेदवार प्रेमबहादुर पुलमी छिन्तुले आफूलाई राष्ट्रवादी भन्ने नेकपा एमालेले संविधान र व्यवस्था विरोधी कमल थापालाई बोकेर हिंडेको बताए । 
‘केपी शर्मा ओलीले पटक पटक संसद् विघटन गर्दै मुलुक र संविधान मास्न खोज्दा जोगाउने शक्तिहरु अहिले एक ठाउँमा रहेका छौं । संविधानमा हस्ताक्षर नै नगर्ने र संविधान मास्न खोज्नेहरु हाम्रा विरुद्ध रहेका छन्’, उनले भने, ‘अब को राष्ट्रवादी, को राष्ट्रघाति जनताले चिन्ने बेला आएको छ ।’ 
प्रदेशको संरचना हटियामा लैजान खोज्दा एमालेबाट निर्वाचित तत्कालीन मुख्यमन्त्री डोरमणि पौडेलले नदिएको आरोप लगाउँदै उनले राजेन्द्रप्रसाद पाण्डे मुख्यमन्त्री भएपछि गठबन्धन नेतृत्वको सांसद्हरुको पहलमा हटियामा संरचना निर्माण गर्न लागिएको उनले जानकारी दिए । 
मुलुकको विकास एवम् प्राप्त उपलब्धीको रक्षाका लागि सत्तारुढ गठबन्धनका उम्मेदवारले जित्नुपर्ने औंल्याउँदै उनले मकवानपुरको सबै क्षेत्रमा गठबन्धनको जित सुनिश्चित भैसकेको दावी गरे । 
‘स्थानीय तह निर्वाचनमा प्राप्त मतलाई आधार मान्ने हो भने पनि हामी धेरै मतान्तरमा रहेका छौं’, छिन्तुले थपे, ‘हाम्रो मतलाई सुरक्षित राख्दै एमाले र राप्रपाको भ्रम र झुटको खेतीलाई जनतासम्म पु¥याउनु जरुरी छ ।’ उम्मेदवार छिन्तुले भने ।