हामी ५ दलकै साझा उम्मेदवार हौं : पराजुली

३ कार्तिक, हेटौंडा । गठबन्धनको तर्फबाट मकवानपुर क्षेत्र नम्बर १ को प्रदेशसभा (ख) का उम्मेदवार आन्दराम पराजुलीले आफूहरु ५ दलकै साझा उम्मेदवार भएकोले सबै राजनीतिक दलले अपनत्व ग्रहण गर्ने गरी काम गर्ने बताएका छन् । 
गठबन्धनले हटियामा आयोजना गरेको कार्यक्रममा उनले अब ५ दलकै नेता कार्यकर्ताहरुले एक अर्कालाई विश्वास गर्दै आफ्ना उम्मेदवारहरुलाई जिताउन लाग्ने बेला आएको बताएका छन् । 
‘गठबन्धनलाई विश्वास नगर्दा एकजना माननीयले हार्यो भने गठबन्धन नै सरकार बाहिर रहने स्थिति आउनसक्छ’, पराजुलीले भने, ‘संविधान च्यात्न खोज्ने र जनतामाथि कुठाराघात गर्नेहरु विरुद्ध बनेको यो पवित्र गठबन्धन हो । संविधान र व्यवस्था विरोधी तत्वहरु हाम्रो प्रतिस्पर्धी छन् भनेर हामीले बुझ्न र बुझाउन जरुरी छ ।’ 
जनताको प्रतिनिधि बनाएर पठाउन अनुरोध गर्दै उनले प्रत्येक दिन २४ घण्टा नै जनताको सेवामा खटिने प्रतिबद्धता जनाए । ‘म २०७४ सालको स्थानीय तह निर्वाचनमा हेटौंडा उपमहानगरपालिकको मेयरको उम्मेदवार थिएँ, मत पाएर पनि प्राविधिक रुपमा हामी हा¥यौं’, उनले थपे, ‘मेयरमा हारेदेखि नै निरन्तर जनताको सेवामै छु, रहिरहनेछु ।’ 
प्रदेश सभा क्षेत्र नम्बर (क) मा प्रेमबहादुर पुलामी र (ख) मा आफूलाई मतदान गर्न अनुरोध गर्दै उनले प्रतिनिधिसभा सदस्य पदका लागि केन्द्रमा पहुँच भएको र मकवानपुरको भूगोल बुझेको महिला नेतृ महालक्ष्मी उपाध्याय डिना उम्मेदवार रहेकोले मतदान गर्न अनुरोध गरे । 
नेकपा माओवादी केन्द्रका १७ नम्बर वडा अध्यक्ष रंग अधिकारीको अध्यक्षतामा भएको कार्यक्रममा नेकपा (एकीकृत समाजवादी) का जिल्ला सचिवालय सदस्य कृष्णबहादुर सापकोटा, नगर अध्यक्ष ध्रुवबहादुर भुजेल, नेपाली कांग्रेसका संघीय सभापति दामोदर खनाल, नेकपा माओवादी केन्द्रका नेता विजय गौतम लगायतले गठबन्धनको जित सुनिश्चित भएको धारणा राखे ।