ईन्द्र बानियाँको प्रश्नः जनताको सेवा गर्ने बेलामा लालबहादुर, महेशहरु कहाँ थिए ?

४ कार्तिक, कैलाश । लोकतान्त्रिक बाम गठबन्धनको सिफारिसमा नेपाली कांग्रेसबाट मकवानपुर क्षेत्र नम्बर २ (ख) का प्रदेशसभा सदस्यका उम्मेदवार ईन्द्रबहादुर बानियाँले विपक्षी पार्टी एमालेबाट उम्मेद्वार बनेकाहरुको जनपक्षीय कामबारे प्रश्न उठाएका छन् । यसअघिको साढे तीनवर्षसम्म एमाले नेतृत्वको सरकार हुँदा आफ्नो क्षेत्रको विकासका लागि केही काम नगरेको भन्दै जनताले उनीहरुलाई भोट हाल्नुपर्ने आधार खोज्नुपर्ने बताएका हुन् ।
शुक्रबार मकवानपुरको कैलाश गाउँपालिका ३ स्थित कालिकाटारमा भएको गठबन्धन दलको अगुवा कार्यकर्ता भेलालाई सम्बोधन गर्दै बानियाँले भने–’महेश वर्ताैला भन्ने ४० वर्षीय युवा अहिलेसम्म  कहाँ गएर लुकेर बसेका थिए ? त्यत्रो ३ वर्षसम्म एमालेले एकलौटी रुपमा सरकार चलाएको थियो । केन्द्र र प्रदेशमै साढे तीन वर्ष लालबहादुर र महेशको पार्टीले सरकारको नेतृत्व गरिरहँदा यो क्षेत्रमा कति बजेट ल्याए ? गाउँलेका दुखमा कहाँ साथ दिए ? जनताले प्रश्न गर्नेछन् । ’
केपी ओेलीको चाकडी गरेकै भरमा वर्ताैलाले टिकट पाएको भन्दै बानियाँले आफ्नै भूगोल र परिवेशबारे बर्ताैलालाई राम्ररी जानकारीसमेत नभएको दावी गरे ।’हामीलाई पाहुना उम्मेदवार भन्दै हिँड्छन् रे, हो हामी पाहुना नै भए पनि भूगोलको विकासमा गर्व गर्न लायक काम पनि गरेका छौं, तर महेश भाईहरुले के गरे ?’ बानियाँले भने–’महेशले आफूले आफूलाई र  केही आसेपासेबाहेक कसैले पनि भोट हाल्नेवाला छैनन् ।’ 
मुलुकको व्यवस्था परिवर्तनको लागि आन्दोलन हुँदा त्यसलाई रोक्न खोज्ने र देश टुक्र्याउने नारा दिने शक्तिहरुसँग गठबन्धन गरेर एमाले नैतिक रुपमै पतन भएको बानियाँको भनाइ थियो । ’हिजो गणतन्त्रको लागि आन्दोलन हुँदा गोली हान्ने कमल थापाहरु, तराई टुक्र्याउछु भन्ने सिके राउत जस्तालाई दोबाटोमा बसेर एमालेले सूर्य चिन्ह बेचेको छ ।’ बानियाँले भने ’अब नैतिक रुपमै एमाले भासिइसकेको छ । जनताले विश्वास गर्ने आधार नै छैन ।’